غسلت من قلب غرامٍ له سنين=ومحيت غيرك من غلاي وبقيت نت
والحين أنا المجنون فيك أنت هالحين=ولجلك .. غدر بي طبعي الوافي وخنت
أيه أعترف لك خنت مرة وثنتين=ولا ترجعني معك مثل ماكنت
لكن .. من أول ماعرفتك وللحين=وأنا أحس إني شفيت وتحسنت
صرت آتحرى جيتك يوم يومين=وأقسى وإلى طالعت في صورتك لنت
أهديتني كلمة وكلمة بحرفين=سمعتها منك وكبرت وتفرعنت
وماعاد تغريني بَعَدْك المزايين=كني عن عيون العذارى تكفنت
فيك أنت مايستلهم الفكر والعين=وأكتب وأشوف الشعر والفكر فيك أنت
أنت الغلا .. والشوق وأنت القوانين=اللي ذبحني ظلمها كلما حِنْت
معك نسيت الطيش والماضي الشين=عقلت من جد وركدت وتوازنت
وإذا مكذبني تعال وشف لوين ؟؟=خذتني أشواقي عليك وتسلطنت
صرت أعشق الليل وخيال المحبين=وأزرع لك ورود المحبة بالإسمنت
أخذت منه .. أكبر طموحه بليلين=وغرست حبك .. في حشاه وتكونت
لا قلت .. أحبك لا تردد قل آأمين=وآمن .. مثل ماني بك أيقنت وآمنت
من مين خايف وأنت الأجمل ومن مين=تغار وأنت أجمل من الصبح لابنت
دامي على شانك غيرت العناوين=خذني معك لأحسااسك العذب لاهنت
تعال .. وأكتبنا على الواقع اسمين=اجمل حكايةعاشها شبّ مع بنت
وأنا أوعدك .. وأنت إعتبر موعدي دين=والله .. لو يذبحني البعد ماخنت؟