ياضيقةٍ بالصدر قررت انا اشكيك =على الملا واللي حضر هاهنيا
عل وعسى نلقى لك احدٍ يداويك =يكسب ثوابي ما لفضله جزيا
فني خبير بفك صعب الشرابيك =ولقاسي الضيقات شخصٍ قويا
بفتح ضلوع الصدر فتح الشبابيك =تنفسي يا كتمة البال هيا
مدري وش اللي يربط يدي بيديك =وانا من اول زارع الصبر فيا
لو ينشدوني عنك ناسٍ تدانيك =ناسٍ تلظى نارها بالخفيا
اقول : "مالي علم فيها ولا اخفيك =صدري شمالي ماختلف فيه شيا "
واليوم لا والله كفي بكفيك =متلاحمه ماني عليهن سطيا
لاقبل ظلام الليل كنه يناديك =وانتي مع الليل اتفقتي عليا
لامن ندبك وقلتي : امر ولبيك =لبيك يامن تشعل الصدر ضيا
افديك انا والصدر والروح تفديك =قل ماتبي وش تشتهي ويتهيا
وامسيت متبهذل وروحي ب اياديك =واضحى خفوقي للغرابيل فيا
انشهد اني غصب صرت اعترف فيك =والصبر ماهو للمواجه جريا


‏