علامك يا هجوسن حدّت الشاعر على القيفان=هجر كل الشواغل وأرتمى في حضن هوجاسه
زوى في ركنها والصمت ينطق من على الجدران=ولا غير القلم تسمع صهيله فوق كراسه
ينظّم من ذخايرها ويفتلها على النيشان=وفي جو الخيال الخصب يطلقها من أقواسه
يوجّه قافها المحموم حتى ياصل الوجدان=عسى يا علّ تتوقد شغاف القلب وإحساسه
هذاك اللي ثوى في القلب وأنفاسه مع الشريان=ليا هبت رياح الشوق قلبي يشهق أنفاسه
يسافر هاجسي وأنا رهين السجن والسجان=ويرجع من مدارجها ويوصف لي مدى يأسه
وعلى منوال صفحات الزمن يتكرر التبيان=وتتجدد جروحٍ كلما تشفى لها إنكاسه
ألا يا من حبست الهاجس المسجون في زنزان=متى تعفي وتطلق هاجسي في جوّ وأوناسه
تراود هاجسي جولات تعبُر عالم النسيان=وتطوي صفحة الماضي وتقطع هول وسواسه
رِحال الأمنية تاهت ولا حطت على العنوان=وضاعت هقوة الهاجس وحطّت من قوى بأسه