يا خساره لا اختلف بعض الرجال =واختلط مر الشراب بسلسبيله
من عرف درب الفضيله ثم مال=ويش عذره لو ترك درب الفضيله
أشهد إنه شال حمل ما يشال=وأشهد إنه حط في صدره مليله
يا إلهي وانت عالم كل حال=ما على قدرة جلالك مستحيله
تفرج لقلب همومه كالجبال=الجمل لو شاف حمله ما يشيله
والله إني يوم شديت الحبال=ارتخى حبله وأنا حمولي ثقيله
ولعي يا نار دام الحال مال=ولعي يا نار في راس الفتيله
ولعي دام اختلف حال الرجال=والدروب الخيره صارت قليله
الدرر من دونها الموج استطال=ودي آصلها ولا باليد حيله
مير في بحر الاماني والخيال=جبت من بين الدرر دره جميله
جيتها يمكن يروق اليوم بال=بال من عيت ظروفه تستوي له
من يلوم القلب لو شد الرحال=دام ما له للفضى درب و وسيله
دور وتلقى مع العالم مجال=بين من كل المعالي ترتقي له
بين من لا يجذبه قيل وقال=دايم أفعاله على قوله دليله
وش نبي في مسلك ما هو حلال =ووش نبي في منبع ما سال سيله
واللسان حصان لكنه وبال=لا غدى ما ينطق الفاظ نبيله
رب كلمه يا عميلي لو تقال=شوهت تاريخ من يسوى قبيله
وانت دايم للعلا مضرب مثال=خانك التوفيق جنبت الجزيله
الوصل بين الأحبه راس مال=يوم شفت للأسف صرت تحبي له
والزمن لو كشر أنيابه ومال=ما يخلي خل وافي مع خليله
والأسود إن قطعت لحم الغزال=الضباع تدوج من بعده ذليله