وينك؟سؤالٍ موجه لك ولا له جواب=جاوب على من سأل يالحلو قل وينك
اضماك وارد غديرك بس يطلع سراب=لو بس تلد لي لو من طرف عينك
اما انت ماكنت تدري ان هجرك عذاب=والا انت مغتر يوم اقول يازينك
مهما تطاولت مايمكن تنوش السحاب=لقلبي وقلبك قرارٍ لازم ايدينك
لايمكن اسلاك حتى لو يشيب الغراب=لكن ماني خاتمٍ في خنصر ايمينك

(( يا غـايــبـــه ))

يا غايبه لو غاب زولك عن الشوف=ما غاب طيفك عن خيالي دقيقه
كتبت لك من صادق احساسي حروف=وبخاطري من ضيقة الخِلْق ضيقه
الكل منا يالغلا مر بظروف=ذقنا من الصدمات مُرّ الحقيقه
واقع مآسي غدر الايام معروف=ما للحزن غير التناسي طريقه
تعال انا وياك نروي ضما الجوف=ونزرع من الورد المعتّق حديقه
تعال انا لشوفك ولقياك ملهوف=تعال بُعدك يشهد الله ما اطيقه
بين الامل والشوق والياس والخوف=النفس في بحر المشاعر غريقه
يا مرهفه نفسي ترا مالها شفوف=في غيرك وغيرك عساه بحريقه