يا مرحبا ترحيب من روس الأخوان = وترحيب من راسي وراس الهواوي
باللي لفى يوم أختفى شهر ما بان = مثل القمر لا غاب ياتيك ضاوي
من دلة الهيلا نقهويه فنجان = مبهرة بالهيل والعود جاوي
أعلامنا وأحلامنا دوم صنوان = وآمالنا تمضي بدرب الرجاوي
وشيخنا خيال يسلم كحيلان = من حكمته ساق الحِكم والفتاوي
يا ليت حظي سار وأعطيه عنوان = وأحقق أحلام اللقا والهقاوي
خطوة على خطوة ودانه على الدان = والساق ينقلها ليا صار ناوي

‏

ياهاتفي ب اوكلك بالمراسيل=مادام برج العاصمه متصل لي
لي صاحبٍ عسى مرابيه للسيل=دارٍ تضم اهله وضمت هلٍ لي
هذي مكاتيبي ولا يمسي الليل=الا محله تاصله من محلي
عودٍ لو ازوره محبه وتبجيل=قحص على شونه من اجلي يهلي
ماكني امقفي من ابريل لبريل=اقفاي حرٍ شاف خربٍ مولي
عز الله اني فيه قصرت بالحيل= لو ان لا ودي ولاكان دلي
لكن باذن الله لجي بالمقابيل=ان كان ربي في حياتي مهلي

ياهاتفي دندن على نافل الجيل=فرخ اشقرٍ بالنايفات امتعلي
رجل المواقف من نوادر رجاجيل= على محياه النبوغ امتجلي
كم ميل بين الجدي عن نجمة سهيل=عنه الردى ابعد بل يزيد الف ملي
سلطان ما يشكي رفيقه من الميل=بسماحة اخلاقه يسمى مسلي
اقابله لا اقبل جري سبَّق الخيل= ما جا لزوم الشون جعله يولي
اما بكاسرت الركايز من الحيل= والا بمفرودٍ مع امه مفلي