اللي يشاغلني خياله من الامس=حتى غدت كل التفاكير دوبه
كبدي على شوف الغلا تنحمس حمس=لااشتقت تليت اشهب اللون صوبه
زوله دوى الضيقه وحكيه جلا العمس=لو كل كلمه منه تجي محسوبه
يادوب يسمع وزن صوته على الهمس=نعم صدق من قال زينه اعجوبه

تهناك السعاده والفرح والهنا ياطير=صدرك ما يضيق وخاطرك دوم منساحي
لا مليت من بستان لمجاوره تطير=عيشك ضامنه مولاك والماء لك امتاحي
وانا اللي بصدري يانديمي يشب الكير=جاراتك يزيدنه على ضيقه انواحي
ومعهن طواري كل ما اضحى ضحاه اتغير=وتهجده ليا اغفى ما كفاها وهو صاحي
تورط بمن معهم تورط وهو صغير=وهالحين لون العفر في مجهمه لاحي
قولي يالحمامه له او قول يالخفير=وشلك بالغزل مادمت راعي وفلاحي
لجل اقول علقني بها ساطعٍ نضير=ليا ارخا اللثام بظلمة الليل له ضاحي
وعيون اشقرٍ يتل سيره يبا المطير=فِعل رمشهن بالقلب عن شلف ورماحي