قولوا لراع الغلا وش غيّبك يالغلا = ما يدري أن الغلى في القلب سبة غلاه
قولوا له الهاجس المفتون جاه البلا = لا والله إِلاّ بلاه .. اللي مسبب بلاه
قولوا وأنا أقول واحياه وأهلا هلا = هلّ المطر بعد ضيّ البرق واحيتاه
يالغيمة اللي مزونك فاق منها الكلا= أشواقنا للسوالف مثل شوق الرعاه
لا جيت تعشوشب الدنيا وهمٍ جلى = يا بخت من عايش الفرحة وهمّه نساه
اليوم حلّ الربيع وفاح ورد الفلا = ونجمة الصبح تنثر ضوها للفلاه
القلب يا روضة الخلان بعدك سلا = عساه دايم على ذا الحال دايم عساه
إما تكن هكذا دنيايْ .. وإلا فلا = كلٌ على صدته يرجع ويسمع صداه