سكون وايضا جونا شبه غايم=وجو السجن مصحي بلا غيم وسكون
حتى العصافير اسكتت والحمايم=هدو رهيب وقبل كانو يغنون
نرجو عسى هالوضع ماهو بدايم=وياليت من راحو علينا يردون
المال راسه ربح دون الغنايم=يالله دخيلك عودت دون في دون

لو ماحصل منا مدايح ولا رد=من القافله يمكن تبقى بقيه
ننفخ بجيب حضور هالربع وانقد=بالون فجر في طلق بندقيه
دع ذا وشف وش قلت في باهي الخد= اللي عيونك بعد فقده شقيه
منتوق جيد وسيد لي رواي القد=مدايحي له تعتبر منطقيه
كنا عسل في سمن واليوم وش جد=القصد سامي والنوايا نقيه
لغير الثلاث اكيد ما امتدت اليد=ولا قد هقينا بعدهن من هقيه
همسه عسل يعجبك بالمزح والجد=ومن المعتق مجلسه فيه اوقيه

يالربع انا حكمت حكمٍ غيابي=ماهوب يستانف ولا حي يلغيه
كلبش خفير السجن حضرة جنابي= وحكمي على جوجو من اليوم ملغيه
متقاعد وراعي معيزا اعرابي=ولامن شعر ويقال الابداع مطغيه
وعودا على راع الثمان العذابي=بقاف الغزل ذاليل حبيت اناغيه
يالترف انا قلبي من الشوق ذابي=وزادت عليه من التوجد غواغيه
والجيب عاتب لو يعرف العتابي=قد حلحلت كثر المساري براغيه
وراسي قلب غرنوق بعد الغرابي=وشعيل مزعجني بكثرة رواغيه
من اول صَعَبْ من لد يمي يهابي=وصرت العسيف بكفك اومي وصغيه
هذا بعض ما بحت به في جوابي=وغير الذي مني تعرفين ما ابغيه