ليش القلم من بين اباهيمي ايطيح=اكيد من قاف العذب زاد طيشه
يالعذب من قاسا فواده تباريح=بغياهب اشواق وليالي وحيشه
به تسرح اهموم وترده مراويح=فاهي فكر تقول مدمن حشيشه
اتجرحه ذكرى غواليه تجريح=واتلى لقا في كل لحظه يعيشه
ياويحه من الفقد والوجد ياويح=امحق صبر يلقاه وامر عيشه

حزب المزايين شايبكم بوسط السجن ميت طوى=جبتو سمك والبدو ما تاكله والجوع ما يرحمه
عين بعشاكم وعين ايلد فيها يم(مالك لوى)=ماهيب عاده لنجلاء بس حظه هالمسا محرمه
يبا ايوايق على المهره يعلمها لكن ما قوى=عدا على كرسي الحارس وهو كبر الجمل واصرمه

يالعاصمي هد نفسك تو ربع الشوط ما راح=خله يدحدر لاتحبس له كلتش ايفوح ريحه
ريح النفل والبختري والخزامى ذعذع وفاح=وابشر عقب فاج ريح المسك مني في مديحه
حبيت احرك كوامن هاجسك واسمعك وارتاح=لعذب القوافي ليا هام الهجوس امع القريحه

البارحه يالنوم وينك وويني=من العين وش طيرك ياجعلك القوم
مريتني قامت تخمخمك عيني=واركض على ساقتك واطيح واقوم
واثر سبب هجتك فرقا خديني=مضى على غيبة محياه كم يوم
ابو قوامٍ مثل عود الرديني=وكتف وردف والوسط ضامر ومفصوم
ريان عوده به طراوه وليني=وعين اشقرٍ شاف اشقرٍ يدرج الحوم
وخدٍ ورا الشيله شعاعه يبيني=ومثل البرد يفطر بهن من نوى الصوم
على افراقه بس اصفق بديني=يومٍ رحل فيه اريش العين مشئوم
دع ذا وراع الجيب خله يجيني=وفك الكلبشه من رجل شايب القوم
من امس مزعجنا بكثر الونيني=ويصيح دايم والسبب غير معلوم
وقبل الظهر عطنا على الجيب (زيني)=مرحوم يايومٍ لفا فيه مرحوم
حطه بزنزانه يشيله هجيني=بدع الصفا والا قديم من الألبوم