على بحور القوافي طولها والخفيف = يا مركب القاف شد اللحن والقافيه
أبحر وهات النوادر والدرر والظريف = وأجلب من العمق درة خلها طافيه
وأحمل جواهر مصاغة كنها من جنيف = على النقى مْن الشوايب صافية صافيه
وأرسل لشيخ القوافي والسمي والحليف = من جوهر آداب شعري كلمة ضافيه
سلّم على الناقد الروقي وديرة عفيف = والجَمعة الطيبة والرفقة الوافيه
ون قدّر الله بفرصة جيت ، ما ني بضيف = والله لآجيك لو كان القدم حافيه
وليا تعذّر .. فأنا أتْشرف بكم في المصيف = والله يديم اللقاء والستر والعافيه
والوعد عند الهواوي من شهور الخريف = يا كم وعدنا ولكن جيّته جافيه

يامرحبًا من ضميرٍ ماتغَشَّاه زَيف=عداد منهو سعى فالبيت واطَّافيه
بالشاعر اللي بعثلي من مهاره عسيف=على ظَهَرها الموده يوم جت لافيه
أنشهد إن القصيد العذب للراس كيف=ماكنه ألا علاج وجرعةٍ شافيه
لاهنت مِد الوصل والحِمل ماهو كليف=خوفي طريق الوصل تجتاحه السافيه
حقك علينا الشحم والبن وسط المضيف=وحقٍّ عليك القدم لاترجع خلافيه
اِمسك طريق الحجاز اللي يودي ثقيف=مع خط مَيسان كان اشارتي كافيه
وإن ماكِفَت, فالحويه من بَعَدها العطيف=والكبري اللي بظلم تقول مشرافيه
وإن كان تبغى البدايل فابْو راكَه رديف=ثم تْربه عقبها الخرمه ماهي خافيه
تعال ليتك تشوف بعينك أصفر عفيف=من سبته عان ناصر مهجته دافيه
إن كان مُوعدك ياتيلك لجمسه وحيف=يسري مثان الليالي والعرب غافيه