تكفى ياجوال دندن لو برقمٍ غريب=ما احب انا الصمت عطني شخص ابا اكلمه
الصمت لاطال من خلٍ تحبه مريب=حيث انها تعتبر لهجوسي الملهمه
اتعب ليا ابطيت عن صوته ويزهم واطيب=وما افهم كلام الجميع وما تقول افهمه
للولف كم ناح من ورقا وكم حن نيب=ومن الفراق اعتقد كلٍ خذا مسهمه

شدتني يابن فراج كلمه جميله منك=بعدها عرفت انك بطرق الهوى خبير
قبل قصة المرسول للي بها فاتنك=وانا عارفٍ يصلى المعاليق لاهب كير
جفا الخل يفنك في علو الضماير فنك=وليا زاد بالعاشق تمدد على سرير
شديد الحراره يالمعلم يذيب الزنك=وانا اقول قلبٍ يحتمل بالمدح جدير
عسى وبل مزن الوصل يالمحترم غاشنك=بنعم لا تجيب وخل سرك بقاعة بير
انا كل ما اطريته مضى مار عزي عنك=ذبحك الغرام وعاد قلبك طري صغير
ان اخذت خمس سنين طرد الهوى ديدنك=عليك السلام ورحمة الواحد القدير

لولا الثمان وبالضويحك علامه=ويحيط فيهن قرمزي تقل بللور
وفي موضعٍ يقرب من الخد شامه=وهدبٍ تجمل خرس والخد له نور
ومشيه مرتب تقل زرت حمامه=والخصر بين الكتف والردف مهصور
تهون هذي مع حلاوة كلامه= يستسلم اللي يستمع له على الفور
للشوق كان اقول مع السلامه=بقاف الغزل مانيب لولاه مجبور