زرنا ظلم جعل الضلع والاوديه للسيل= من نوٍ تزبر مزنه ودن رعاده
يضك الشعيب ويمتلي بالمطر ويعيل=ويحذف الطفل لاعلى روابيه ووهاده
مقر الرجال اللي من الطيب توف الكيل=هلا مرحبا فيهم لمن زارهم عاده
استقبلنا ابو فيصل بفرحه وهيل وحيل = وطيبٍ بابن فراج ما ينلحق ماده
زبون الخساير مايجارا قوي الحيل=نعم ما تكفي من خبر فوقها زياده
وقلطنا بعد جينا البلد عند نافل جيل=ابو بندر اللي لاجهلت الكرم ناده
يجيك الكرم باسم ابو بندر وله صهيل=ميراثٍ مخلينه لبو بندر عواده
ولاشفنا بها الا كل شهم ابلجٍ حلحيل=هل اقلط تفضل دوك والنار وقاده
هاكالحين يوم النقع يدعي نهاره ليل=غنانيم روقه كلهم ساده وقاده

على قول اهالي مصر تعال نحسبها=بدقه نعرف اللي خسرنا ومكسبنا
حط بفكرك ايامٍ مضت والتقينا ابها=منا ويش راحت به ومنها بماذا ابنا
ايام الفرح شفها عطتنا مناكبها=وبنا لولست نكباتها اللي بها شبنا
فلا حققت فيها الاماني مطالبنا=ولا من مساويها بعد طولت تبنا

احلل عباراتٍ لي اتبين بين سطور=وهذا هو اللي جابني ثم وداني
اسج بخيالاتي من طويق لين الطور=وتطلع نتايج هالتفاكير مجاني
اصل المشكله هجسي لوقتٍ مضى ماسور=لاحاولت احول موجتي عنه ناداني
بصوتٍ شجي الد يمه بدون شعور=تتوق المشاعر قبل تصغي له اذاني
ايناغي طيوف اتلف في خاطري واتدور=على مبتدا غفوة عيوني تحراني
لها افز قاعد من لذيذ الكرى مذعور=فزة من وطى الافعا برجليه حفياني
تقافت على ذاك الزمان ازمنه ودهور=تولى وانا ما زلت من فقده اعاني
تتابع خرز عقدٍ نضامه غدا مبتور=يلعب فيه شد الحبل مابين ورعاني