المشاركة الأصلية كتبت بواسطة خيال مطير

قام حظك يا قصيدي قام حظك و اعتلا
فوق هامات الخيال وبين طيات الخفوق

أكتبيني جرح لا بالله أقريني غلا
اعتزي بي شاعر ٍ للقمه العليا سبوق

أن بدت لي دنيتي حلوه أبادلها الحلا
وأن تمادت في جفاها أصبر وبكره تروق

يالمعارف لو تواريتي عن عيون الملا
واضحة عندي وضوح الشمس في حزة شروق

ارحبي يالغاليه يا مرحبا هلا هلا
ارحبي يا نور عيني بين رمش وبين موق

ارحبي يا شيخة النسوان يا ريم الفلا
ارحبي يلي غلاك تغلغل بــ وسط العروق

ارحبي كلي ولاء يالفاتنه كلي ولاء
أرحبي ما عاد فيها لا عتاب ولا حقوق

والله أني في غيابك عايش بـ هم وبلا
حرقة ٍ في الصدر تكويني ويا شين الحروق

وفي حضورك شوف عيني همي انزاح وجلا
تبتسم لي دنيتي وتلوح في جوي بروق

ما سلا قلبي من اللي قال لك قلبي سلا
والله انه كاذب ٍ يخسا ترى ما هو صدوق

أنشدي المنديل كيف وكيف بالدمع امتلا
أنشدي شعري وقيفاني وحلوات الطروق

أنشدي فية شجر بيتك وهذاك الخلا
أنشدي حزن ٍ تراكم فوق راسي فوق فوق

أنشدي ثم ٍ بعدها أكتبي قصة غلا
من بطولة خافق ٍ ما عذّبه غير الحروق