وين الهواوي وين عبدالله طلال=دعيتهم باالصوت والمخرج ملـي
هم عزوتي مافيه شك ولا جدال=في هاالزمن والا الزمان الأولي
اليا انتخيت ابهم عقال وطيب فال=وفعلاً يموح الدلو قدام الدلـي
هم راس مال اللي ماعنده راس مال=وحزام أمانٍ مايحاليله حـلي
ايصخرون من الثمينات الجزال=باالنايفات الهم مقــر ومنزلـي
يعني كمال ابداع لله الكمال=حسب النظر والمعرفه واللي يـلي
لهم مع العشاق صولات ومجال=ولا اعتقد فيهم حدٍ قلبه خـلي
وانا نظر عيني على الروس الطوال=من دونهم ماضن عيني تمتلي
ابي اتقهوى من مباهير الدلال=وارقا على الضلع المنيف المعتلي
مادام جا للشعر وصحابه مجال=ياالله توفقني بقولي وعملي
البارحه فيها اختلاف عن الليال=قضيتها مابين علمي وجهلي
قرار جمر ونار والاخر هبال=وبين الثنين اتعبت فكري وجمـلي
ان قلت ابصبر طال حبل الصبر طال=همي سحابٍ غيمته ماتنجلي
اليا نويت الوصل جاني كم سؤال =وتجاهلي لاشك محسوباً علي
وين الحرام اليا انقفل باب الحلال؟=وانا الجريح من الهوى والحق إلي
وش حكم دمع الشوق لاطال الضلال؟=وش حكم من يكوي بصيخٍ يصتلي؟
سهل المنال اليوم ياصعب المنال=والشوق يغلي دم شرياني غلي
علي ذنب ان كان نسيانه محال ؟=من بعد مااقفى تحكمه حكمة ولي
يابو عبيد اسمع ياعبدالله طلال=هذا الكتاب المعتمد والمرسلي
ابي الاجابه ياصناديد الرجال=توجيهم مطلوب والمخرج مـلي

باسم الذي رسى الاراضي بالجبال=وبين لنا درب الهدى واضح جلي
يامرحبا لبيك ياسيد العيال=يحفظك من كل الشرور المعتلي
نعم نعم فهمت مضمون المقال=والصدر قبل من المشاكل ممتلي
ماعاد عقب الصوت للحوصه مجال=ياملهمة هجسي على الحكم انزلي
وين العذر لاصار ابن عمٍ وخال=ومن قلب بوابة عفيف ويرسلي
وترويض عذبات اللمى دايم محال=واللي عليهن لي..لهن عوَّد علي
وهلال يمسي بدر ويعود هلال=ويجر من دقنه غزول وينطلي
اخلج فواده من محبة ذات خال=في ذمتي لو ينجلد ما ينكلي
يبي مواصل عشقته بايات حال=لكتب الفتاوي لجلها يفلي فلي
ما كب عالم فالجنوب وفالشمال= ولا مفتي جهينه ولا مفتي بلي
وفهمت انا ما يطلبه في هالسوال= كامل لكن تركه يكون الأكملي
وشرقت عيونه في دموعه واستمال=قلبي..وعيني لجل وضعه تهملي
ودورت له فتوى عقل ما ادري خبال=وراحت بعد وقع عليها المرسلي
مباح يعني لاحرام ولا حلال=ولا يعترف فيها بلال ولا عليِّ
وصلوا على خير البشر ما انشا الخيال=وما هل دمع الخال مشعل واهملي

حييت يا رجّال يا قرم العيال = ترحيبةٍ تاصلك والخالق وِلي
عزوتك وقت السّلم و اوقات القتال = وروس الخشوم اعرامها يغلي غلي
اليا انتخيت ابنا تعدّينا الخيال = نشرق على سود الامور وتنجلي
حنا حزامك وانت في عسر الليال = احزامنا الحيّ و ذرانا المخملي
انسيّس المعنى لذربين الخصال = وانصخر القيفان نارٍ تصطلي
وانته يابو بندر مثل عدٍ زلال = يروى بك العرفج ويروى الحنظلي
ناديتنا وارهقتنا منك بسؤال = لاتحسب انّا الشافعي والحنبلي
حنّا على باب الولي يابن الحلال = عودين محرقنا الزمن شوي وقلي
ودّك تعدّ الحَب في وسط الغلال = و ودك تقصّ السنبله بالمنجلي
توّك شباب وفيك نزوه واشتعال = ولا فلاك الشيب في راسك فلي
عينك تخيل البرق من غرب وشمال = والرزق عند الله وباب الله ملي
اركد وخلّك جاهز لكل احتمال = يمكن تعشّى حاشي ويمكن طِلي
والبارحه فيها كلامٍ مايقال = الاّ ليا غنّت عتيبه مع بلي
ودّي مثل ودّك نمشّيها عدال = والحب باقي للحبيب الأولي
لكن مثل ماقلت في عرض السؤال = اصبر يامال الخير والخالق ولي
وان ضاقت الدنيا على صدرك تعال = حنّا معك واصدورنا تغلي غلي
وتعوّض الله خير بالرزق الحلال = ويعوضك الله ياكريم المنهلي