جاني ولدها مبتسم بيـن الأطفال = ومن بسمته ذكرت أنا بسمة أمه

راحت ثمان سنين حلٍ وترحـال = راحـت ثمـانٍ كلها مدلهمـه
قضيتها بالحب والشـوق رحـال = بشوقٍ تحدى كل يأسه وهمـه
سألت عنها سنين وشهور وليـال = ولا فيه فجٍ غير وجهـت يمـه
وعقب الثمان اللي تعبها برا الحال = جاب الزمان الكارثه والمطمه
جاني ولدها مبتسم بين الأطفال = ومن بسمته ذكرت أنا بسمة أمه
شفته وصاحت داخلي كل الآمال = بصوتٍ عجزت بكتم الأنفاس لمه
وركضت له دمعي على الخد همال = ومن كثر شوقي قمت بالحيل أظمه
ولحظه حظنته والطفل في يدي مال = شميت ريحتها على اطراف كمه
واستلهمت نفسي مقاديم الأهوال = وتم الضياع وأكدت لي متمـه
ليت الغياب اللي شغل غربتي طال = ولا دور العاشق على حرق دمه
واليوم بنت الناس في بيت رجـال = حب ٍ على غير الشرف لي مذمه
مجبور أعود واشتكي كل الأميال = بنفسٍ حزينه كائبه مستهمـه
أرجع غريبٍ مستوطن بر ورمـال = يموت * يحيى * يندفـن * مايهمـه