ياعين مال النوم هالليل طاري=وأن يسّر الله دربنا ماتنامين
ألا بدار الحضرمي والبخاري=لعيون أم الحسن والملح والزين
لعيونها أسري طوال المساري=وأذلل الصعبات واللي قسى يلين
أللي تشوف الغيد مثل الجواري=من زينها أللي مادخل فيه تخمين
أللي تماريبي وأنا أللي أماري=في حبها من بين كل المحبين
ياعنك أبوها ماركب فاللواري=ولا يعَرف مزاينات البعارين
يؤمن بأن الحب واقع حضاري=ياحليله حليلاه طلق الحجاجين!!
من الخبر من بعد جتني طواري=سريت مسرى الذيب بين السراحين
ماهمني لو يكثرون المزاري=اذن عجين وأذن في وسطها طين
القلب معلن فالخفوق الطواري=على أهبة استعداد له حول شهرين
والليله أعلن إل هبوط أضطراري=في قلب من حطت حياتي نياشين
الليله أشوف الفرح له مواري=في قلبي أللي ماجهل لوعة البين
أشكي عليك الحب يابومشاري=والحب تدري له نظام وقوانين
الحب لو هو يابن عم أختياري=أخترت عنه ايسار وألا من ايمين
القلب معه العين واحساس طاري=في لوبي الأشواق بين الشرايين
يعقد لهم جلسة نقاش استشاري=وجدول عمل يوضع وتوضع مضامين
وأن أجمعوا يصدر قرار(ن)وزاري=أني أحب ونحتفل بين غالين
وفي هذي الحاله أصدّر قراري=ونسخه مع التقدير للقلب والعين

القلب معلـن فالخفـوق الطـواري=على أهبة استعداد له حول شهريـن