مـجاريـات

سلام عليكم ورحمة الله وبركاته
مجاريات اتمنى قبولها

البدع محمد فراج الغنامي

هات الورق يا لحميدي والقلم هاته=في خاطري كلمتينٍ جات حزتها
يا راكب اللي على بديه ولزقاته=رشت وكالت تيوتا حي رشتها
لكزز تميز عن اخوانه ب لوحاته=عون اربعه تقصر انفوسٍ تهقوتها
كنه مع السايد الايسر ليا شاته=معواد حربيةٍ من عقب هجمتها
ما همه الدرب لو طالت مسافاته=توايره تقصر المشوار دورتها
وصل سلام العطاوي مع تحياته=وبيوته اللي هجوس الشعر صفتها
لشاعر اللي عسى الله يرحم امواته=هو مركز النادره فالشعر وسبتها
ما جازلي غير صرف الجزل فبياته=تقول يصرف من الدولار عملتها
هذاك ابن عون عبدلله وعاداته=يرهي على الطيبه ويجيب هامتها
تلقاه في مجلسٍ مدهال لبداته=على عقاب الدلال يدير صبتها
ما يحسب حساب كم وصلت خساراته=يفداه من عود البيبان صكتها
شيخٍ تزيده على الطالات هقواته=يوم ان بعض العرب في حلو نومتها
ثم سلمه ما كتبته والخبر هاته=عن جادلٍ سقم روحي ما تعدتها
اتلاء العهد به يوادعني بنضراته=وانا وقفت ارثي لحالي وحالتها
فجت ضلوعي برمح البعد وزماته=تبى تكحل عيون الحب وعمتها
وقفت بعد سلمة قلبي معاناته=وازريت اداوي خفوقي من محبتها
على كثر مرسل المرسول بوصاته=عيت تهيا لبن فراج شوفتها
وانا يا بن عون صبري في نهاياته=والعين عيت تذوق النوم سبتها
في عبلتٍ بين ظلم وبين سفواته=حملت عيني ورجلي فوق طاقتها
صدري شمالي لاكن النفس مشماته=تضغط على العين لين تبين عبرتها
واليوم حتى الخلا ضاقت مساحاته=ولاعاد الي فيه خاطر عقب غيبتها

رد الشاعر/عبدلله ابن عون

يا حلو مارود ابن فراج ودعاته=الي عساها تباريها استجابتها
شد انتباهي وجازت لي مجاراته=شكوى عتيبيٍ اقتصيت جرتها
شكوى عتيبيٍ اخرها تنهاته=ما شدني للمجارا الا عذوبتها
يشكي من العشق صولاته وجولاته=وروحه يقول انها باخر نهايتها
اسقاه ريم الرماحيات جرعاته=وصبح مثل قيس مع ليلى وسيرتها
مجنون ليلى سبب جنه وخلاته=هجران ليلى بعد طالت مغيبتها
ومحمد الي حصل مع قيس ما فاته=فرق المحبين لاحقته مضرتها
واليوم انا عند هقواته ورغباته=والرجل تفداه خطوتها وعنوتها
لحقت علي الحميا في مواساته=ولاعاد انا بمتخلٍ عن قضيتها
لو كان طرد الهوى فاتت ملذاته=ارباح اهاليه ما ردت خسارتها
ابا اركب الي وصوفه وامتيازاته=قد وضح الشاعر المشتاق صورتها
وبحتزم لالسفر واحضر كلافاته=ويبى يصير اتجاهي يم حروتها
ان كانهي حول ظلم وفي حضافاته=ابا انحره واتنشد عن وسيمتها
اما رفيقٍ يوجهني برمعاته=ولا عليه استدل بوسم ناقتها
وان كان عنه الخبر جتني بشاراته=تابعتها لين اشوف اخر نتيجتها
وان شفت رغبت هدفها في مراعاته=فانا من اجله كفيلٍ في كلافتها
وان شفتها عقب تعذيبه ولوعاته=ما رايعت له ولا طابت سريرتها
فزعتله فزعةٍ تبرد حسوفاته=تفرق عن الفزعه الي مثل قلتها
يترك هواها ويسلم من مصالاته=والمقفيه لا تجرب فيه قوتها
وان قال في غيرها مالي تلفاته=ولا عيش في ديرةٍ ماهيب ديرتها
نخيت ربعه وجيرانه وفزعاته=تقطع علاقة محمد من علاقتها

الشاعر / غازي عشق الخراصي

هيضني محمد الفراج بـ بياته=اتلامس القلب قيفانه وقصتها
وجبرني الخاطر اغني مجاراته=لو كان ماهوب يمي درب وجهتها
لاكن صاحت جروحي من عباراته=وستيقضت كل ذكرى عقب نومتها
قلبي ماعاد يتحمل عقب صدماته=ادناة قصة هوى تشقيه قصتها
ذكرت ما فات من وقتي ودوراته=ذكرى المحبه شجون القلب هزتها
عانيت مثله من الحب ومتاهاته=قصت غرامٍ مضت جتها منيتها
جرعني الحب مره وسط كاساته=ما مر ليله ماعاني من مرارتها
اسهر وراقب نجوم الليل ما باته=والناس في نومها تهنا براحتها
اليا اظلم الليل زاد القلب لوعاته=اهموم قلبي معه دايم علاقتها
ادله النفس بالمسرى وسجاته=لو كان مالي بسجاته وطرقتها
احس مسراي والخط ومسافاته=يخفف شوي عن نفسي وضيقتها
وفكار تلعب براسي وده وهاته=ينتابني خوف لا ضيع بمغبتها
اسباب غيداً خذت بالزين هاماته=الفارقه بالجمال وزود حشمتها
حبيتها حب بانت بي علاماته=على النقى والشرف عندي محبتها
حبيتها والهواوي جرحه اسكاته=يخفي ونفسه يعاني من مشقتها
ليت العطاوي ما غنى عذبت ابياته=ذكر عليه سنينن ذقت قسوتها

الشاعر / بادي شجعان النفيعي

الليله انا عن المجلس ولمباته=والديره اللي تدوش الراس صجتها
اخترت للفكر ما يشرح مسافاته=والنار دوب استوت يا نجر شبتها
دن المعاميل مني والحطب هاته=هاضتني الشيله اللي صاغ شيلتها
صوت ابن فراج نادتنا مناداته=نلعب طواريقها ونعيش قصتها
في معزلٍ يعطي الهاجوس مشهاته=ما عقب ابن عون فزعاتن نسبقها
لامنت بالله وبالقران واياته=سليت جردن تهاب الشلف سلتها
منابع الشعر هم دجلاه وفراته=تجبر كسور العضام الصم جبرتها
ما خلق دعوى بدون حلول بتاته=لو ما تهون العلوم تهون ضكتها
وصل المغني لمن عمم مجاراته=اقصى حدود العرب بالصوت سمعتها
جزايلٍ من مواقيفه وجزلاته=لا قدم الوقفه اللي جات حاجتها
انا اشهد انه فزع وافزع قراباته=لو ما تحرك من القوات قادتها
شكوى محمد تعدت ظلم ما جاته=جت عند من ينطق الكلمه ويثبتها
في محكم القول يكفي قول من جاته=اختاره اللي عليه اسند حمولتها
ما نشطل الراي عن دربه ومنحاته=يستاهل الرايه البيضاء ورزتها
عبدلله اللي يقود الراي ببياته=ثقافة الشعر خاض وغاص غبتها
كل القرارات توقفها قراراته=اما نطح وجهها ما جاب ساقتها
ذخاير الطيب ما يبخل بهباته=ونا ومملك افدى روحه وهبتها
لو ان درب الهوى تتعب ملفاته=والارض بين القمر والشمس دورتها
توصل محبٍ فقد عزمه وقدراته=ما جهزوه النشاما قبل طرقتها
اما يعصب الجمل ويلاعب الهاته=لعيون شقحاً تحت زاره جنيبتها
ولا تركنا العطاوي يجمع اصواته=وان كان ما طاعنا يكمل مسيرتها

عبدالله الصقري ,الجووهره ,ملكة الرواسي و 3 آخرون معجبون بهذا

رحيل ,ريم الفلا ,محمد الغنامي

الله الله
صح لسانك مليون
مبدع وجزل شاعرنا
وصح لسان ابن عون عبد الله
ولسان غازي عشق الخراصي
ولسان بادي شجاع النفيعي
مبدعين وجزلين وشهادتي مجروحه في الجميع
مروري وتقديري المتواضع
يسبقه ختم التميز

عبدالله الصقري ,محمد الـفراج معجبون بهذا

الله على الأبداع
محمد ابدعت واكثر وهيضت الشعار
صح لسانك بعدد حروفها
وصح لسان بن عون مجاراه رائعه
وصح لسان الخراصي
وصح لسان النفيعي
ولاهنتوا

محمد الـفراج معجب بهذا

وعليكم السلام ورحمة الله وبركاته ..

الله الله
لله دركم يا عمالقة الشعر وينابيع جزالة
صحت ألسنتكم جميعاً على هالابداع الغير مستغرب

محمد الـفراج معجب بهذا

بعد إذن الإدارة ابي اثبت الصفحة (:

محمد الـفراج معجب بهذا

ياسلام عليك يالفراج
مجاريات جزله وكلها فخامه
صح لسانك ملايين
يعطيك العافيه
تقديري لك

محمد الـفراج معجب بهذا

ماشاء الله ابداع
صحت السنتكم ولا هنتم جميع
يعطيكم الف عافية

محمد الـفراج معجب بهذا

اقتباس:

المشاركة الأصلية كتبت بواسطة محمد الغنامي

الله الله
صح لسانك مليون
مبدع وجزل شاعرنا
وصح لسان ابن عون عبد الله
ولسان غازي عشق الخراصي
ولسان بادي شجاع النفيعي
مبدعين وجزلين وشهادتي مجروحه في الجميع
مروري وتقديري المتواضع
يسبقه ختم التميز

صح بدنكـ
يابو بندر ولابداع وجدوك لا عدمتك
يشرفني تواجدكـ