احدى روائع الشاعرالكبير/ عبدالله بن عبار العنزي (وصف الرجال )

17-06-2017, 03:28 PM

الـنـاس كـلـن لــه طبـايـع وعــادات+++وكلـن علـى التقليـد والسـلـم داوي ‏
النـاس مـن خلقـت تناويـع وأشتـات+++مثـل الأصابـع مـا تـجـي بالتـسـاوي
وتـرى البشـر لهـم مثايـل وصيفـات+++مثـل المعـادن بـه جـواهـر ومــاوي
تلـقـا الـعـلـوم الغـانـمـة والـرديــات+++مع البدو وأهـل القـرى والشـواوي
رجل عفيف ولا مشى دروب سيـات +++عنـده علـى حسـن الطبايـع بــراوي
عاقـل لطـيـف ولا تـجـي مـنـه زلات +++يرجي الولي ما هـو لغيـره رجـاوي
عنـده يقيـن أبــواب ربــه وسيـعـات +++وكـل المـلأ موعـود رزقـه سمـاوي
صاحـب عقيـدة مـا ذكـر فيـه بوقـات +++ما حاد عن مظمـون قصـد الفتـاوي
ورجل يـدور العـز سهـران مـا بـات +++للمرجلـه والطـيـب والـجـود هــاوي‏
يـــدور بالـدنـيـا مـعـالـي وطــــولات +++شبحـه بعـيـد وبالفـخـر لــه مـنـاوي
يلقـا المصاعـب بالـعـزوم القـويـات +++وينـطـح عظـايـم كـايـدات الـدعـاوي
صنديـد مـا تشكـل عليـه الصعوبـات +++لـو ثقـل حملـه لأثقـل الشيـل قـاوي ‏
ورجل مجـرب فـي جميـع المهمـات +++رام الفخـر لــو حــال دونــه بــلاوي
مـبـداه عـالـي والمقـاصـد رفـيـعـات +++شبـحـه بـعـيـد ولا مـرامــه دنـــاوي
يـنـظـر أمـــام ولا يـدنــق لـدنـســات +++حيثـه علـى فعـل الفضيلـه شفـاوي ‏
جــزل وأشــم ولا مـبـاديـه هـــزلات +++عـون الرفـيـق وبالـلـوازم حـمـاوي‏
ورجـل كريـم وفـيـه بالطـيـب هـبـات +++يفرح به الهاشـل إلـى جـاه ضـاوي ‏
‏ شهم وكريم وبه شهامة وشومـات +++يتعب على الجزلـة صبـور وحيـاوي‏
ما يذخر الواجب اليا شـاف عـازات +++لـو كـان مالـه جـرد بشـت حسـاوي
يرغـب لفعـل الغانـمـة بــه مــروات +++يشفـق علـى حـالـة رفيـقـه ويــاوي
ورجـل فهيـم وكـل طـرقـه سنيـعـات +++مــدرك بصـيـر وللمشـاكـل أيــداوي
للخير فـي وجهـه رسـوم وعلامـات +++علمه صعد من فوق راس النبـاوي
سهـل الجـنـاب لعـزوتـه والقـرابـات +++كان أنقطع بالنـاس وصـل العـراوي
وللضد أحد من السيـوف الرهيفـات +++علـى خصيمـه مـثـل حــد الـرهـاوي
ورجل حشيـم ولـه كرامـة وجاهـات +++يفـعـل جـمـيـل وللجـمـايـل جـــزاوي
طيبـه نقـي مـالـه مقـاصـد وغـايـات +++وعن الخطأ صافـي ضميـره نقـاوي
يرفا الخمال أن شاف غره وخملات +++ما هو على الصاحب كثير الشناوي‏
لو شاهـد عيـوب المـلأ كبـر أبانـات +++يـسـتـر ولا هــــو للمـعـايـيـب راوي
ورجــل ثقـيـلٍ بالمجـالـس وسـكّــات +++يأخذ عبر من قول وصف الفـراوي ‏
أن صـار بالمجلـس مغالـط ولـجّـات +++وأصبح لمهروج السوالـف مـلاوي
يـشـوم دام الـهـرج مـالـه مـجــالات +++كـان أنطـلـق بالثـرثـرة كــل غــاوي
وأن هرج هرجه مثل نقد الجنيهـات +++قرايـضـه مـثـل الـقـراح الـصـفـاوي
ورجل صمـال ولـه مراميـع جـزلات +++يتعـب علـى علـم الفخـر مـا يـراوي
وأن جاء نهار فيه صولـه وجـولات +++يرخـص حياتـه دون ربعـه هـداوي ‏
وأن صار ما بين الرفاقـه حـزازات +++يسعى لهم بالصلح ما هـي هـزاوي
يسعى لهم بالصلح فـي حسـن نيّـات +++حيثـه لفعـل الخـيـر راغــب ونــاوي
ورجــل قلـيـل الـفـود بــواق غــرات +++عمّـال عـن درب الحقيـقـة عـمـاوي
ضــاع الشـبـاب وضيـعـه بالمـلـذات +++بيـن الملاعـب والطـرب والغـنـاوي
يـدور بالصـاحـب هـزايـع وعـثـرات +++ويتعب على رفـق السفيـه الفـلاوي
بالنـاس تلـقـا لــه عـوايـن وشــلات +++فاسـد ولأصحـاب المفاسـد أيخـاوي
ورجـل طمـن وأفعـال جـده قديـمـات +++نسل الرجال أهـل الكـرم والقهـاوي
لـو كـان جـده مـن رجـال الشكـالات +++مجـده محـاه وبــات يطـويـه طــاوي
مـا ينفـعـه تمجـيـد جــده إلــى مــات +++ولا يؤخـذ الصالـح بذنـب الشقـاوي ‏
ولا يرفع المثبـور ترديـد اللـي فـات +++راحت على مـا قيـل مثـل الحجـاوي
ورجـل بخيـل ولا يحـوش الجمـالات +++لـو كـان مالـه كثـر رمـل الصـداوي
وش عاد لو يملك خزايـن وشيكـات +++مـا ينـفـق إلا فــي نـفـاق ورشــاوي
ماله على الجودا مساعي وهومات +++دايـم عـن العليـا قصـيـر الخـطـاوي
مـن شبـتـه مــا قــال وده ولا هــات +++بالمجـتـمـع كـوبــان كـنــه فــــداوي
ورجـــل دويـنــي والفـعـايـل دنـيّــات +++سهـاج لعـلـوم الـرجـال وسـهـاوي ‏
صاحـب نفـاق وعيشـتـه بالحـيـالات +++بـلاف يـرخـص شيمـتـه بالـحـراوي
ضعيـف نفـس ولـه صنـايـع ودقــات +++دايـم علـى البلغـه بعـيـد الخـطـاوي ‏
عـن الفـخـر دايــم يديـنـه قصـيـرات +++ما هو علـى حفـظ الكرامـة غـلاوي
ورجـل يخـور بمنزلـه كـنـه الـشـات +++طـول المـدى تلـقـاه بالبـيـت ثــاوي ‏
لا زايـــر غــيــره ولا جــــاه زورات +++وسـط المـلأ لاشــك عــده خــلاوي ‏
متريّـح ولا لـه عـن البـيـت نـوهـات +++عند الحليله مثـل وصـف الضـراوي
مـن خلقتـه مـربـاه بـيـن الخـونـدات +++مطـواع لشـوار الـمـرة مــا يــلاوي
ورجـل هــذور بالمجـالـس وكـشّـات +++يغثـي البشـر بالقروشـة والـقـراوي
يـبـث مــا بـيـن الـخـلايـق دعـايــات +++يفرح على الفتنـه كـذوب وسـواوي
يلـفـظ كــلام بــلا براهـيـن وأثـبــات +++مــا ينـوخـذ قـولـه يـهـقـي هـقــاوي‏
يهـبـيـه رب الـكــون نـقــال نــمــات +++يــدور غـــرات الـمــلأ والـمـسـاوي
ورجـل مـريـج ولا تفـيـده أرشــادات +++عـدل القـوام وجوهـر العقـل خـاوي
ما يستفيـد مـن التجـارب والأزمـات +++مـا غيـر لـولاح السحـر والكـلاوي ‏
حقـر وسفيـه وكـل طرقـه سفـاهـات +++تمضي حياتـه بيـن هـاوي وعـاوي ‏
الهايت المسفوه مـن صاحبـه هـات +++حيث النمـورة مـا تشـادي العـواوي
ورجـل إلـى شفتـه هدومـه نظيـفـات +++شكلـه وسـيـم وزاهيـتـه الكـسـاوي
وقـت الـرخـا نفـسـه كبـيـره وقـنـات +++لا شـك مـابـه خـيـر يــوم الـحـداوي
يفخر إلى سوى شباشـر وشوشـات +++عـلـى القـرايـب دايــم لـــه نـخــاوي
شــره عـلـى دانــي دوانـيـه بـالـذات +++لكـن عـن القاصـي مديـده ضحـاوي
حتـى الربـايـع بالنـعـوت معـروفـات +++هنـف العـذارى زاعـجـات النـعـاوي
بيض العواتـق بالتواصيـف خفـرات +++ســود المقـانـع لابـسـات الغـشـاوي
يجـذب لميـع خـدودهـن تـقـل لنـبـات +++يركـن علـى قلـب المشقـى مـكـاوي
الـفـاتـنـات الـكــايــدات الـمـكـيــدات +++يا مـا وقـع بشبوكهـن مـن هـواوي
من يخدعنه شـاف حسـرة ولوعـات +++مالـح نـكـاد الـمـر عـقـب الـحـلاوي
كم هايمٍ من وجدهن مضى الأوقات +++راحـت حياتـه بيـن هـنـد ومـضـاوي
كم من غلامٍ من سبب وجدهن مات +++باسبابـهـن لـفـوا عـلـيـه الـغـطـاوي
البيض فيهـن بالوصـوف أختلافـات +++ما هن سـوى مثـل الثمـر بالقنـاوي
‏ البيـض فيهـن محصنـات وعفيفـات +++الله وهـبـهـن بالحشـيـمـة عـطــاوي‏
وفيهـن كذلـك طـاهـرات وشريـفـات +++مــا عـرضـن لمروجـيـن الحـكـاوي
أيـضـاً وفيـهـن سـافـلات ورزيــلات +++ضـمـن معايـيـب الــردا بـالـمـزاوي
فـيـهـن شيـاطـيـن وبـهــن آدمـيــات +++صقـر النصافـي عدهـن والـخـلاوي
أطيبـهـن الـلـي بالـخـدر مستـكـنـات +++مـا عـرضـن بـيـن الـمـلأ لـلـزراوي
مـــا ينـقـبـل تدويـجـهـن بالـمـحـلات +++لا دوجـن بالسـوق لأجـل الشـراوي
يـقـودن الهلـبـاج لـلـسـوق سـجــات +++كـنــه أجـيٍــر عـنـدهــن بـالـكــراوي
قـلـتـه ولانـــي للمخـالـيـق شــمــات +++ولا خيـر باللـي مــا كـلامـه قــداوي
قلتـه وتوصـيـف الخـلايـق كثـيـرات +++سجلت من وصف المجرب شفـاوي
الطيـب كـايـد والمـراجـل عسـيـرات +++ولا كــل مــن يـقـدر يـنـط الـعــلاوي
ومن لا كسبها بـأول العمـر هيهـات +++مـا حاشهـا عـود مــن الكـبـر ذاوي
تـم الكـلام وبالعـدد عشـر عـشـرات +++قافـي بديتـه مـن ضميـري شـفـاوي

ملكة الرواسي ,محمد الغنامي ,شيخـــة الغــيــد و 1 آخرون معجبون بهذا