يالعذب تكفى لا تجر الصوت جدّدت الجروح= خليت قلبي يرجع لماضيه ويعوّد ورا
طرّيت له فرقا وليفن غاب وأولها.. مزوح=ثم طوّل الغيبه وهمّي وسط خفّاقي سرا
ياجعل يسقا قبل افارق صاحب الوجه الصبوح= اللي من افراقه عيوني ماتهنّت بالكرا
انا اشهدن حال المفارق عند خلق الله فضوح=من واجهك من دون لاتخبره باللي بك درا
وانا اشهدن صدّة وليفي هدّمت كل الطموح=وانا اشهدن قلبي تعذّب من بنات اهل القرا
ياجعل منهو سبّب الفرقا .. من اهمومه ينوح=سبّب فراق الخل واللي كاتبه ربّي جرا
ومن ماجرا همّي تصمّدني وعيّا لا يروح=وغديت انا ويّاه فالدّنيا جماعه واخشرا
الوقت بهمومه عجل.. واللا بفرحاته شحوح=ولا لنا اللا نطلب اللي جل شانه قدّرا
وياصاحبي لوترجع بعذرك وتطلبني السموح=خلاص..انا من باعني مايستحق المشترا
روّح بدربك والليالي تجعل الغامض وضوح=وبتعلّمك منهو بدرب الحب صد ودبّرا
حدّيتني يالعذب اسولف..يوم جدّدت الجروح=وخلّيت قلبي يرجع لماضيه ويعوّد ورا