هلت تباشير الفرح وانجلى الهم=وانزاح كابوس الفراق وطواريه
والتم شمل(ن)كان لابد يلتم=اخلافنا وان طال يومين تكفيه
يامرحبا باللي على العهد مقسم=مايسمع العذال واهل المشاريه
وانا وعدته والوعد دين ملزم=لبحر معه من حيث تبحر سواريه
نوره سطع في واقع(ن)كان مظلم=طلت حبيبي بدر تضوي لياليه
يافرحة القلب الجريح المتيم=اليوم راجع له طبيبه يداويه
الغيث يحيي له هشيم (ن) محطم=وشوفة حبيبي غيث قلبي وساقيه
حنا صبرنا واخر الصبر مغنم=والصبر مثل الدرع امانٍ للراعيه
اقبل ياسيد الحسن انا فيك مغرم=وخل العذول يموت من حر مافيه
جسر الوصل ساسه ترى ماتهدم=اعتى عواصيف الدهر ماتعريه
مادام انا واياه بالحب ننعم=ماتهدم العذال نرجع ونبنيه
غرد يابلبل لحنك اللي مقسم=اصدق لحون الحب لحنٍ تغنيه
يرقص له احساسي على كل سلم=يمكن لقى فالحن حس(ن)يحاليه
هلت وسوم الخير والجو مفعم=عطر الخزامى من بشاير حراويه