لا جيت للساحل بكت فيه الأشناق = ولا رحت للدهنا تصيح البوادي
ولا سال دمعِ فوق الأوجان رقراق = صاحت بي ثيابي ولو هي جمادي
كل العرب يابوي للدار تشتاق = لاشك شوقي غير كل العبادي
الله من صدرِ من البعد لا ضاق = يشوف لون الشمس لون السوادي
وأمشي تقل مجنون مابين الأسواق = وكل العروق إللي بجسمي تنادي
أسمع صدى صوت تعزيه الأبواق = وأشوف زولِ من له سنين غادي
وأسري مع السارين عيني بالآفاق = تنظر سحابِ في شمال البلادي
أوميلها من بعد وأعانق إعناق = وأذرف دموعِ سيلن كل وادي
سلام يا حايل من الشرق مشراق = سلام يا ريحة هلي يا مرادي
رمّانةِ يوم أثمرت فيها الأوراق = تركتها يابوي وقت الحصادي
أركض مع الأيام يابوي بسباق = حار القدم والشوط لا زال بادي
حار القدم يابوي وأستاحش الساق = والنار خلّت جوف صدري رمادي
واااااااا شيب عيني غربتي صارت فراق = راحت سنين العمر تنقل شدادي
حايل وأهل حايل بقلبي بالأعماق = لو طال مشواري وطال البعادي