ياعماد قم يابوك دن المعاميل =واحكر لنا فنجان زاهي شقاره
فنجان بريه وقنده بالهيل =وافطن ترى خابرك راعي شطاره
باقي ليالي عقبها يطلع سهيل =من عقبها يابوك زيح الستاره
وانقل لنا عراك نبغى ليا قيل =ياهيه يالي تدفعون البشاره
ابشر بجرتها على الطفل وقبيل =نور من المشرق يجينا حماره
ونقصها ياحي شوف المداهيل =ويطلع عليها قاطعٍ من حراره
ان داسها بالقاع شفت البهاذيل =وان شلعت شفت الغير في طياره
ابيض نحر كاسي كفوفه سراويل =اشقر ظهر صافي وباين غتاره
في محجر عيونه كهوفٍ مضاليل =وفي مفرعه هيبة شيوخ الاماره
افجح قصير كراع فيه التماثيل =اللي يدورها قديم الصقاره
مخالبه من فوق وكره شناكيل =قصاب لكن مالها بالجزاره
مشدد السبع الموامي وفالذيل =نقش الثريا ماخذٍ في استداره
شاريه يوم اهل الدراهم مساطيل =قليل فيه اللي دفعته نعاره
في ذمتي وش مادفعته به قليل =طراة راس وبخص عرف وجساره
بايعه اقفى في كثير المحاصيل =في خاطره ضوى جمال التجاره
واقفيت اقلب كف يمناي تقبيل =وامسيت كني منصبٍ في وزاره
وش عاد باقي بس يابوك لسهيل =حتى عن النادر نزيح الستاره
نبغي ليا قال القروم المشاكيل =عراك وينه قلت فوق الغماره
صاحوا بذكر الله وكثر التهاليل =وحول بها من دون حد الزباره
ثم قرب دلالك وباقي المعاميل =واحكر لنا فنجان زاهي شقاره