ديوان الشاعر / عبدالله الصقري

كتاب




يااهل الملامـه لا تلومـون منصــاب
لا تعـذلـونـه وادعـوا الـربّ يشفيــه

دام السفر بالحرف والصفحه ركاب
حملـه على صـدر المواويل يرميــه

على خيـال ٍ صاحبــه طـوّل غـيـــاب
العشره اللي بيننـــا ما اثمـرت فيــه

تـرى بعض تجريحـي لقلبـه عـتــاب
و ان مات ما اظنّ القصـايد بتحييــه

يا لابـس ٍ من غـاوي ظنـونـك ثيـاب
الى متى يكـسـيــك ظنّـك و تكسيـــه

عليك راهـنـت البعـيـديـن و اقـــراب
واذاك خـايب عطني القلب عطنيــــه

وراك لايمني و فيك الرجـــا خــــاب
حتّى سلامك عفت بـ اوّلْــــه تاليــــه

مابي سلام ٍ تـدهنـه ضحكـة النـــاب
إن ما صفى نبعــه من القلب مابيــه

لـفيت لك يا متعـب الـــرّوح طـــلاّب
تركتني و الجـرح بالجوف مخفيـــه

وصفتني في عـزّ صـدقي بـ كـــذّاب
وعلى مزاجك كل طـبــع ٍ تـسـمّيـــه

لا تحسـب انّي بيـن يـدّيـنـك كـتـــاب
تـقــراه وقت الكيف بعـدين ترميــــه

حلفت باللّي فرّق جْـمــوع الاحــزاب
لآاعـلّمك معنى يبيــعـك و تـشـريـــه

ما يقـدر احدٍ يستر الشمس بحجــاب
واللّه ومن لايعرف الصقــر يـشويـــه

ما ظنّي الاصحـاب يبلـون الاصحــاب
لأنّ الـــرّدي من يومــه اللّه مـردّيــــه

و احــدٍ يبي للحبّ تعـريـف واعـراب !!
و اقـول نـاظـر في جبيني مـواريـــه

هو كلمةٍ ترسم لك الكون بـ اعجــاب
حرفين تـطـوي بـالسعـــاده بـلاويـــه

يقول سمّ العقـرب اهون من الـــدّاب
واقول نبت الحب من سمّـك اسـقيــه

شرهة جروح ٍ لمّهـا شوقي و جـاب
حـكـم ٍ يبــرّئ ذمّـــةٍ مــا تـبــرّيـــــه

الحب له سـيـف ٍ يـطـيّــر بـه رقــاب
و بــدمّ كلّ اللّي يحبّــون مــرويـــــه

فيـه الوفـا جرم ٍ لمملـوك الاهــــداب
لا صار محـدودٍ على شوف مغليــــه

فيه الأمانـه غــدر و الصــدّ ترحــاب
فيـه الـوعـــود الـزايـفـــه مـا تخلّيــه

فيه الوهــم بـ الهـمّ شيّبني و شـــاب
ظـنّيتـه يـسـلّـيـنـي اثــري مـسـلّيــــه

والحب يااْهــل الحب لا شــك غــلاّب
سنيـن منّي حطّهــا في مـخـــابـيــــه

لا مـا هـقيتــه للتـفـــاكيـــر ســــلاّب
الين شفتـه يـسـبـي الحــال يسبيــــه

عندي جميع الخلق لي أهل واحباب
لكن عـشيــرالـقلب غــابــت ليـاليــــه

كم واحدٍ بالصبح يتـبـع لـه اسبـــاب
وانا نـديــم اللّـيــل و اقـرى تلاويـــه

ما طـاب لي ليـل ٍ ولا نـوم لي طـاب
من سبّة اللّي شبّ فـ القلب صاليـــه

ذاك الّذي نـاداني بـصــوت مرتـــاب
رحـل و انـا كلّي يـــردّ و ينــاديـــــه

هــذا وانا ما تـبـت عـنّـه و لا تـــاب
عن كل ما يغـريـــه و يظنّ يغـنيــــه

قسمت لي يـا ربّ من عينـه حــراب
و بـ حكمتـك له قـدتني وانت ملهيـه

يــامــا تــأمّلتــه و فيــه الخفـــا ذاب
فـي جنّتــه ما حـقّـق أصغــر امانيـه

بالأمس يرعـاني و بابـه على البـاب
والـيوم لـو يرعـــاه قلبي يجـافـيــــه

خـلاّ حيـاتي بـ داخل عيـونـي تْــراب
ما منْــه لا وردٍ ولا شــوك و اجنيــه

الـقلب من جــود العنــا ألّـف كـتـــاب
فيـه الـدمــوع تـصـبّ قـآفٍ ينـاجيــه

المشكلـه (ما يستمـع غير لـ الــرّآب)
مـا هــزّه امْن الـشعـــر بيتٍ يبكّـيـــه

البشر أصناف




ولّ ياقلب ياللي من المحبّــه عنيت
ما تكفّ و تتوب من الغلا و الشجون

كيف ماتعتبر من دربك اللي سريت
في زمان ٍ بعد زان وصفى لك يخون

الوفا كلمه وتاخذ من الشعـــر بيت
جرحها ما عرفه اللي كتبها بـ هون

ضاع عمري ادوّر حاصله وش جنيت
راس مالي لقيته تذكره للجنـــــون

كم صدوق ٍ ليا مال الدهر وارتكيت
يبذل الروح لو حلّت بقلبه طعـــون

وكم صديق ٍ بوقت الضيق جاني وعطيت
يوم جار الزمن ما عاد عندي يجون

ليه يومي على حدّ الصراط اهتديت
راغت خطاي وماعندي ذنوب و ديون

وليه يومي جحيم ظروف غيري طفيت
أحترق مالي من الألف واحد حنون

ليه ساعة وفيت بوقفتي ما نجيت
مات حلمي و تذكاره بقى بالعيون

يالشعر يا أعزّ رفاقي اللي بقيت
خلنا دونهم نلهى بـحزن اللحون

أحسب انّي لهم فيما مضى لي وقيت
أثرهم بـاظلم الغبّات لي يحفرون

لو عرفت البشر أصناف لامابكيت
والزمن للذي مثلي غشيم ٍ يمون

بحر المرح



إحســاس بالغـربــه و نشـوة فرح
واحساس امان و ليل مليان خوف

وصدرٍ ٍ لـ ميلاف الـهموم انـشـرح
ماصدّق الـواقـــع وعينــه تشـوف !!!

معـنـــاي ما يستـوعـبــه من جرح
لو يفهمــه ينــلاف بالجــرح لـوف

لو خآضـوا الســالـين بحــر المرح
ما يـجمعــون الـــدرّ من كل جـوف

خيـال



أنا ماني بـ محتــاجــك خيـال
أشـوفه بس ما تمْسـكه يـدِّي

أبي من قبلمــا أنطق : تعـال
تجي وتقـول يالملتـاع هـدِّي

أحبّك واعرف انّك لي محـال
وانّك ناويٍ هجري و صـدِّي

و لكنّ الهـوى يا ابن الحلال
يبيِّـح دمعتي من فـوق خدِّي

ما ينفع الطب



روَّحت ادوِّر على الفرحـه
في عين انســـــــان لاقيتـه

رجعت و بـخــافقي جرحـه
مـايـنـفـع الطب .. حبّيتـــــه

وش خـذاهــا




طــرقــت انــا لأيّـامـي الفـايـتـه بــــاب
لـعـلّـي اعـــرف وش خـذاهــا حـيـاتـي
جاوبـنـي الطـيـف المـعـلّـق بـالاهــداب
شـفـتـه وذكّــرنــي بـفـرحــة شـقـاتــي
مـعـاه قلـبـن لـــي مـسـاريـه بـحـسـاب
أوّل .. قــــل يـغـويــه حب الـبـنـــاتــي
معـه سـهـرت اراجــع سـطـور بكـتـاب
والله ولا استـوعـبـت قــصّــة وفــاتــي
مـاغــاب ياقـلـبـي مـــدادك ولا طــــاب
يامـدمـيـن لاجـــل الـمـجـاريـح ذاتــــي
البـسـمـه الـلــي علّقـتـنـي بـ الاغــراب
نسـيـت منـهـا الفاتـحـه فـــي صـلاتــي
كـنّـي بـهـا و الهـمـس بعيونـهـا شــاب
لا صـبّـهـا دمــعــه ولا هــــي تـحـاتــي
هي آيــتــن كـلـمــا تـأمّـلـتـهــا جـــــاب
معـنـى الـولـه شـوقـن بمنـشــاه مـاتـي
قـلـت اسـألـك يـاجـامـعـة كــــل خـــلاّب
هـو بالهـوى جرمـن لـيـا جــاك عـاتـي
قـالـت خـمـيـل الـوجــد لبّـسـنـي ثـيــاب
و مـعــه عـزيـز الـجـرح طــرّز عبـاتـي
قلت الـظـنـا هـاتـيـه فـــي خـافـقــن ذاب
قالـت عظيـم البـــوح و اعـظـم سـكـاتـي
صـوت الـوفــا بـالحـب مبـكـي إذا غــاب
و لاجــل الـهـنـا كـلّــن يـــدوّر هـنـــاتـي
ما ينفعــك مـن شوفـتـي حـلـم و عـتــاب
مـخـــدوع لـــو تـحـلــى بعينـكـ صـفـاتـي
وان كــان قـلـبـك للمـجـــاريـــح رغّـــاب
لا تطـحـنـك دنـيــاك داخــــــل رحـــاتـــي
حــرام تـرهـن عمـرك بلحـظــة اعـجــاب
قـلـت اسكـتـي يـكـفـيــه شـوقـي مـبـاتـي
يـانـاويــه تـبـديــل الاحــبــاب بـاحـبـــاب
خـــلّــــي بـقـلـبـكـ خـانــه لــذكــريــاتــي
و تذكّـريــه الـلـي سبــايـبــك مـــا طـــاب
يــامــا عــلــى شانــك تـجـاهـلـت ذاتــــي
و يامـا نجـوم الليل صارت لـي اصحــاب
ومــجـــاذب الأبــيــات جــــرّح لـهـــاتــي
لا ترســمـيـن الـحــب ونّـــات مــرتــــاب
أنـــــــا لــغـــيـــرك مـاقـويـت الـتـفــاتــي
أبـاعـتــرف .. هالقلب من شـفـتك انصاب
غـيّـرتــي بـخـمـســـة دقــايــق حـيــاتــي

جـنــة العشـاق


كل عاشق له وتر يعزف عليه
يطربـه لو هو بنغمـاتـه حزين

من فؤاده تنبش جروحـه يديه
لين يحيا هـاجس الحب الدفين

إنتهي يا قلبي و لا تقـول ليــه
لا تغـرك يالظمي غـيمـة حنين

دام تــالي جـنــة العشـاق تيــه
خلهــا يا ضـايـع ٍ بين السنيـن

سرى خلّي


سرى خلّي و اخـذ قلبي معــه
و انـادي لـه تعــال و ما يجي

أنـا وش حـاجتي حين اتبعــه
و ليش البـال عـنّه مـا سجـي

ألا يــا لايـــم ٍ قـلبـي دعــــــه
وش يهـمّـك نجى أو مـا نجي

ترى كاس الهوى من يجرعـه
يـورّده الـســـرآب و يـرتـجـي

حبيبي شرهـتـه في مـدمعــــه
و لـكـنّــه نـسـى يـــوم التجـي

قـريـبٍ منّي بـ وقت السعــــــه
و في ســود الليــالي ما يـجـي