ياهل الولع عِـدّو لوقت الحباري@@@قرب طلوع سهيل وملاعب الطير (((قبل طلوع سهيل بأيام)))

هذه القصيدة قبل طلوع سهيل

.

.

.

ممليت من وقتي وطول انتظاري=إلى متى والجوّ عجّ ومعاصير
أبطيت ما شبيت بالبر ناري=يا صرت مع عشّاق بر وصقاقير
القيض مع يمناي قيّد يساري=واليوم من قيده على وشْك تحرير
ياهل الولع عِدّو لوقت الحباري=قرّب طلوع سهيل وملاعب الطير
النفس ولهانه لشوف البراري=وشوف المطر يا تبّع الخير للخير
السيل من ربدا للوقه خباري=وطاحت محاديره على غربي الشّيِر
ويا راد روّاد الربيع المحاري=والقاع بالنوّار صارت نواوير
عزّمت ثم شدّيت عزم السفاري=يحنّ ماطوره على نمرة القير
و سريت مع ناسٍ تدلّ المساري=مع الصحاري عارفين المعابير
ما حرصهم حرص الحريص المداري=الكل منهم ما يهاب المخاسير
الصيد تضرب له فجوج الصحاري=من فوق قطاع الفرج والمشاوير
ويا عيّنو لبرقا الجناح الاثاري=واقفو مع الجره قصوص و مداوير
وتنهّض اللي للمطاليع ضاري=على الحباري عادته تلّة السير
خطوا اشقرٍ جثلٍ من الريش عاري=نادر نوادير الحرار المغاتير
اللي عليه بشد ريشه مواري=عن ماكرن ما وكّر براسه الجير
مسطور عين وبالهداد انتحاري=صلف الجناح يصخّر الخرب تصخير
يا قام يلقف له هبوب الذواري=و علّق بعوج مثل عوج الشناكير
هذا هواي و رغبتي واختياري=يا حسّب الدينار عبد الدنانير
لو عصرنا العصر الحديث الحضاري=هوايتي نقل الحرار النوادير

محمد العواد

للتوضيح :

- ربدا ولوقه والشير :

أسماء لمواقع في منطقة الحدود الشمالية وفي -رفحاء- بالتحديد

- الجير :

هو نوع من أنواع الصقور

((يـُفَـرَّخ بالمزارع))

وهو غير مرغوب لديّ

الله الله
محمد العواد
صح لسانك واعتلا شانك يالجزل
وابشر بالخير سهيل طلع ومن الحين وغادي ولم العزبه
وان كان طيرك صنيع خفف عليه شوي هههه
قصيده جزل من شاعر جزل ومبدع
راقت لي كثيرا ياشاعرنا
مرورري يسبقه اعحابي وتقييمي

الله الله
ياسلام عليك يالعواد
صح الله لسانك ملايين
كايفه ونايفه وجزله ابدعت وامتعت بهذه الدره الرائعه
دمت ودام مداد قلمك ورقي حرفك الفاخر
تقديري لسموك
النجلاء

محمد العواد
صح لسانك وسلم احساسك العذب
ابيات في قمه الجمال والفخامه
يعطيك العافيه
تقبل مروري واعجابي
دمت بخير وسعاده

القدير
محمد العواد

صح الله السانك واعلى شانك واجدت في بيانك
تقبل الورد
سامي احمد

اقتباس:

المشاركة الأصلية كتبت بواسطة محمد الغنامي

الله الله
محمد العواد
صح لسانك واعتلا شانك يالجزل
وابشر بالخير سهيل طلع ومن الحين وغادي ولم العزبه
وان كان طيرك صنيع خفف عليه شوي هههه
قصيده جزل من شاعر جزل ومبدع
راقت لي كثيرا ياشاعرنا
مرورري يسبقه اعحابي وتقييمي

ههههههههه

صح بدنك

عسى الله يجيب الخير والربيع والصيد

الطير محتاج وكل شي جاهز

وماناقص الا خوّتك يالذيب

شدّ الموتر للشمال وابشر بالمقانيص والحباري

وفلّة الحجاج طال عمرك

اقتباس:

المشاركة الأصلية كتبت بواسطة النجلاء

الله الله
ياسلام عليك يالعواد
صح الله لسانك ملايين
كايفه ونايفه وجزله ابدعت وامتعت بهذه الدره الرائعه
دمت ودام مداد قلمك ورقي حرفك الفاخر
تقديري لسموك
النجلاء

صح ذوقك يالنجلا
وشاكر مرورك العطر

اقتباس:

المشاركة الأصلية كتبت بواسطة المهره الاصيله

محمد العواد
صح لسانك وسلم احساسك العذب
ابيات في قمه الجمال والفخامه
يعطيك العافيه
تقبل مروري واعجابي
دمت بخير وسعاده

أهلاً أهلاً بالمهرة

أنرتي متصفحي بمرورك المنير

شكراً لك 🌹