ديوان الشاعر / عبدالله الصقري

مريت بشويَّة تعب قلت دامني مداوم في المستشفى خليني اكشف

لكن الدكاتره كبروها و تحاليل و اشعه وكلام كثير

الحمدلله طلع مافيني الا العافيه

المهم سحبوا مني دم و وديته بنفسي للمختبر

و كان هذا النص الجديد




أربــع بــراويـــز مـن دمّـي
خــذهـــا يـ ريَّـــان حلِّلهــــا

و من قبـل تحليلهـــا سَـمِّـي
و هات النتيجـــه بـ كاملهــا

مـانـي بهــا حيــل مهـتـمِّـي
ادري بهـا قبـــل اوصِّـلهـــا

خـذ علمهــا الحـق من فمِّي
قبـل الدِّمــا تجيب سـائلهـــا

بــرواز ( حبِّي لـ ابي و امِّي
و آيــآت للـــرَّب ارتِّـلهــــا )

و اكيــــــد تلقـى بنـي عـمّـي
فــوق الثريَّــــا منــازلهــــــا

و بـرواز بـه ( غمِّي و همِّي
و دنيــا كثيـــره مشاكلهـــا )

فيهــــا زلآلـي غـــــدا سِـمِّـي
و الـــروح مـأكــول داخلهـــا

و برواز ( للدَّمــع في كُـمِّـي )
غرقـــان مـن حــرّ وآبـلهـــــا

فيه الوفـا الصــادق الـ جَـمِّـي
فيــه المَحبَّـــــه و حـاصلهــــا

و الرابــع ( اشـلآئـي و لَـمِّـي
و احـداث يصعـب تأمُّـلهــــا )

من قلـب في الحـب ما ضَـمِّـي
إلا الـجـــروح و هـوآيـلـهــــــا

وسلامتكم

ريــان / ممرض المختبــر في المستشفى