اعاصير الوريد(خاصة )

هذا وانا اللي شابك من اول الليل =وتقول انا اللي جيت في وقت ضايع

هذا وانا اللي شابك من اول الليـل=وتقول انا اللي جيت في وقت ضايع
و إن قلت لك عطني جميع التفاصيل = تقول لا شاري ولا نيب بايع
و إن جيت اعاتب قلت لي عدلك ايميل = و لا نيب طايع لك ولا انته بطايع

أقول لك ,, وش تترك الروح وتروح ؟ = يروح معك القلب وتروح روحي
وتبقى شرايين الجسد تنزف جروح = و من عاد يالغالي يضمّد جروحي ؟

جرحت معلوقي وشيّدت لك صرح = بين الضلوع و صرت للبعد ما اطيق
عطني من شفاتك شهد يبري الجرح = اللي من اسبابك نزف في المعاليق

كثر الغلا لك وترجح به موازينك = تأمر وتنهى , تفرحني , و تشقيني
لعل عيدك يعود , اقول لك وينك = ودي اعايدك , لكن وينك و ويني
ودي لو إن اليدين تلامس يدينك =صبحية العيد و اقول إلك ضميني
و ادري من الصعب عيني تشبح لعينك = رمشك سهوم الخطر لو تنظره عيني

بين أعاصير الوريد وبين نبض التاجي = قصة اجمل ذكريات العمر يا ريحانه
لك بعمري ذكريات وشف حروف انتاجي = كلها لك لو نسيت اسجلك عنوانه

لو كان ما نحتاج تفسير الاحلام = و لا فيه رمز نقول فكه يعيقي
إن كان خوفك حطم قياس الارقام = خل المتاهة واخذ علم(ن) حقيقي
خذ راحتك في البعد ما انته بمنلام = وفي خط سيرك خل مشيّك و ثيقي
بس اذكروا بالخير من صدّق اوهام = دنيا , ولا يرضى ان صدرك يضيقي