ديوان الشاعر / عبدالله الصقري

الــدايــــم الله



الــدايــــم الله ولا غــيـــر الله الـــدايــــــم
و الكل مؤمن به و مؤمن بــ ءآيــــاتـــــه

اللي يـسـبّــح لــه الغـرقــــان و الـحـايـــم
واللي مهل خلقــه لمـوعــد حــســابــاتـــه

يـا مـنـزل الويل والخـيــرات بـالغــايــــم
فيني تهـلّــه بـخـيـــر و جـــــرّ ويــلاتـــه

بذرت في حالي المــر ، و الزمـن ضــايــم
يـزخـرف المــوت في عيني بــ سكـراتـــه

مـا كـان عنـدي سـوى بـحـــرٍ و به عـايــم
لـقـيـتـنــي تـــآيـــــهٍ فـي طـيّ ظلـمــاتـــــه

عـقــدت فـيــه الشبـــاك و رامـنـي رايــــم
حين الـشّـبــك مـزّقـتــه انيــاب صـيـداتــــه

هــذا بعض مـا عـطـانـيـــه البـحـــر هـايـــم
و اخـذت مـنـه النجــاة بـــ نــوح مـوجـاتـــه

و ذا بعض مـا صفى من سـومــة السـايــــم
في نـاعـيٍ يـجـــذب الـدمعـــه و لا جـاتــه

مـانـي بــ لايــــم و لــو كـلّـي غــدا لايــــم
حتى و لــو مـاهـنـيـت الـلـيــل و سـبـاتـــه

حتـى و انـا صــآيـــمٍ مـا ظـنّـتــي صـايــــم
مـا دام خــالــف مغـيـب الـنّـجـــم حــزّاتـــه

ما اقــول هـايـــم و لا جيت الخطــأ نـايــــم
أقــول نــادم عـلـى عـمــري ومـا فـــاتــــه

أبــ اطلـب الـرحـمـــه من الواحــد الـدايــــم
و المغـفـــره و منـزلٍ في روض جنّـاتـــه

هتَّآن الجفا


بعض الحكي مثل نجمـه للنظـر تلهي
أخَـذت منهــا بـ ظلمـاتي مقــابـيـسي

والبعض غيمه بَعَد هَلَّ المطـر تجهي
و لا وصل ظـلَّــهــا لأدنى تضــاريـسي

يا سائل ٍعن هواجيـس الخفـا وشهي
تعـال و بـعـيـنـك تنــاظـر هواجـيسي

تـعــال خَـلَّ القـلـوب الفاطنــه تسهي
في رحلــةٍ دربهــا يشهــد بتـدريـسي

أقول فيهــا ترى بعض الصفـا مدهي
و الريـح ماهي مثل هَبَّ النّسـانـيـسي

حتى و لو كـان هـتَّــان الجفــا يزهي
مـا ينبت بـ قلب ٍ مْخـاوي له ابليــسي

الـهـمّ لـو طـاوَعَــه خفَّـاقي الـمَنهـي
عيون شعري على نبضـه جواسـيسي

أنـا عليك بـ شـواهـيــد الوفــا مرهي
دنيت و غْـصــوني الورفـا أحـاسيسي

جَلَبْت من مــرِّي المطعوم لك مشهي
و ضـآعَت بـ غـبَّـة بحـورك مقـاييسي

ما طلت نجم ٍ لـ عين المعرفــه ملهي
و الله و طَـفَّـت مقــابيسي وسـاويسي

أخاف آصآرحك



هَمَس قلبك لقلبي بالوداد
و شفت بنآظرعْيونك دليل

و ليت الهمس للقلبين فاد
و لا بات الغلا دمعه تسيل

أنا آحبِّك وحبِّي فيك زاد
و من حبِّك غدا قلبي عليل

أخاف آصآرحك واجني البعاد
و اخاف ان ما تصارحنا تميل

من الحيره لهيب القلب قاد
ومن صمتي سهرت بلا خليل

غرقى



شُفتْ كِنَّ الخَلقْ غَرْقَى
حَـآضِـنـِيـن حْتُـوُفـهــم

قُلتْ يَالْغَرقَـــااان فَرْقَا
لَا تِـهِـيـن كْـفُــوُفـهــــم

قَـآل يَالرَّحّــالْ بَـ اَرْقَى
و اَسْـتِـبِـيـن وُصُـوُفهـم

دَآمْ مَا للْغَـرب شَـرْقَــا
.. مَـا تِـدِيـن حْلُـوُفهـــم

قُلتْ مَا بالقَـلـب حَرقَـا
هُـوُ قِـطِـيـن سْـيُـوُفـهـم

خَلِّنِي فِـ عْـدآد غَـرقَــى
فِي حَـنِـيِـن حْـتُـوُفـهــم

من الإرشيف
مع خالص التحـيـّــه

...

يعاتبونه




يـامـل قلبٍ يـونّ بعــالي رجـــومـه
يعاتبـونــــه ولا يدرون ويش امــــره

لاقيل مجنون(مجنون الذي يلـومـه)
لو ان بعض المغـارس مـالـهـا ثمـره

سرت بليلي سكـايب جن مختـومـه
و من العنـا جـابت التعميـره الغمــره


سبايب اللي هجرني و اقفت علومه
لاوالله الاّ حضنت بـقـلـبـي الجمـره

في أي ملّه أناجي الليل و آصـومــه !؟
و بأيّ مذهب أصوم وأفطر بخمــره !!!

يا عل قلبِ سهرت بروضة همومـه
يصادف الفرحه ليا طــابت السمـره

المشكله يشرب من اجراحه سمومه
و اذا نهيتـه يعـــاف لــفذّة التـمــره

أقول هدّي..وتملا الكاس ديـمــومـه
تبلّ جوفي ولا حنّت لي القمــــــره

و اقول هدّي..و عوَمني على عـومــه
جعل بشوفـي جميـع الــدّور معتمره

لاياقمر زور ليلي و قـطـّـع هــدومــــه
اللي كساها عيوني و زادها حمــره

اللي رمتني معـاه اقـدار محتومـــه
نجى .. وخلاني بجال ٍ قوى طمـــــره

لا شـك عيني على لامـاه موهــومـه
ما كنّي الاّ غــريب مـقيّل بـسـمـــره

يارامي القلب .. مايستاهل سهـومه
لكن بسيطـه مـدام البــوح لـه زمــره

الليل نجمـه ..ومثلـي مضـيّـع نجومه
ورا غمـــامٍ غــرامـه نـــاويٍ دمــره

والحب بسمـه بثغــرالــورد مرسومه
وقت الربيـع ..وبعدهـا عـزّه فـعمـره

ياويل هـالقلب ..مابـاع الذّي يسـومه
أطيـع أمـره . وهو قلبٍ تحت أمـــره

بذَلْت الـرُّوح


بـلاني ربّي احمـل هـمّ غيري
وفيني ما حد ٍ حسّ و درى

و بكفوفي دِمَلْتْ جروح طيري
و طار وجرح قلبي ما برى

الا وشلون اضيِّـع خـط سـيـري
و ادلّ السَّاهر دروب الكرى !

و ليلي .. في دجـآه اغتال نيري
بعد ما ولَّـعَ الشّوف السَّــرا

إذا تطمس كـفـوف الشَّــر خيري
فلا غير الوفـــا حلّ و طرى

بذَلْت الـرُّوح لاجل يعيش غـيـري
فـ تعبيـري و انا تحت الثرى

أسيرَك يَا بَحَر؟



أسيرَك يَا بَحَر؟ وَالَّا أسيرَ الّليل ؟ مَدرِي
غرامك ما هـو الاّ غـبِّـةِ تَحوِي ظَلَامِي

أنَاظِر يا بَحَر موجَك وفِيه آشُوُف بَحرِي
يعُـوُمَك مَا يَبي غيرَك أحَد يَفهَم كَلامي

حَسَبتَك يَا بَحَر إنسآن قَدرَه فوق قَدْري
أثَاري ذِمّتَك دايم تِخُونْ ... و مَا تلامي

اَبـ اَسأل يا بَحَردَام اَنتْ بـ اَلغَـرقَـآن تَدري
حَياتَه وشْهِي اِلاَّ قَطْرةٍ مِنِّك!؟ و ظَامِي !!

سَرَقتَه يَا بَحَر منهو بـ ذِيِك اَلفُلْك يَسرِي
جذَبْتَـه مَا طَرَى في نِيِّيِتَك غير اَلعَدَامِي

يمِينَك يَا بَحَرمَركِبْ قِدِيمَ اَلخَير .. مَذْرِي
حَلاَ بِـ المِلْح ويسَآرَك بَهَا مِجدَاف دَامِي

و عينَك يَا بَحَر سِر ٍعَلى مَرفَــآه جَهْرِي
تنَاظِرنِي و تِنكِرنِي و هِي تَدري عَلامي

و قَلبك يا بَحَرتَجرِي دِمَآه بـ جَال صَدرِي
و مِنْ يَروَاك اِلاَّ قَلبِي و مَنْ فِيِك عَامِي

أَمَـآنَــــه يَـا بَحَر مَآ دَآمَنَـا جِينَــآك نَجرِي
تِسُـرَّ اَروَاحَنَا ؟ واَلاَّ عَلى خُبْري حَرَامِي

بِـ رَبَّـك يَا بَحَر لاَ بَــآتْ فِي ظَلْمَآك قَبْرِي
تَرَفَّق لَو أحِبّ يِكُوُن فِي جَوُفِـك مَنَـامِي

موت القلوب




من الإرشيف



الا يارب انا وش لي من الجرم الذي باقدار مكتوبه على دربي
أردِّد من رداة الحال كل ساعه دعاي و أنثر الآهات مكتوبه

غدا ذاك الشعــر نجم ٍ و هم ٍ للعيــون وللظّلـوع اللي بها يَربي
تشابه كل مقصود القصايد والقصيد اليوم وده ينتزع ثوبه

و لا شي استوى للي على ظلم الليالي حــاز يا ليل ٍ تبي حربي
تَلوَّن بالنظر مضمون ضيمي وان هنيت العيش لحظه ... غير محسوبه

سنا شمس الفرج لا خط بَاشْفَاق المعنَّى زاد نوح الورق من كربي
رجت هـالنـاس فتَّاح ٍ عليم ٍ رازق ٍ بالجـود و الأقدار محجوبه

أتاجر في جروح القلب من زود الذي شاريه من جرح ٍ غثا شربي
و اسوِّق للسياده عبد مملوك ٍ و هو سلطان زاح الغي موهوبه

أبـ انــدم كثر ما ينـدم ابو جَهْل ٍ على الإســراف يوم يندِّمه ربي
وابـ اجعل هالنهايه لي بدايه و اسبق الأحداث و اعطي الرب مطلوبه

يفك الله غي القلب ويرحمني قبل ما هي النصايب تفرح بقربي
على قبر المولَّع ما هقيت يهزها وجد ٍ تحدَّر و اِهيَ منصوبه

سوالف ما يجي منها سوى موت القلوب و كل صدر ٍ به غلا تَربي
تقول ابعد و باكر يوم حشر الخلق نتلاقى .. مهي بعقول مسلوبه !!!!؟؟؟؟