هنا .. سجن القوافي !!

بيتين جابتهن وللهجس دوره
مادمني رايق وبالحبس فايق

بيوم الخميس اللي تغرد طيوره
مايكون دون الخير والربع عايق

شاعرة نجد ,خيال مطير ,الجووهره معجبون بهذا

هلا بك شاعرنا
ويسعد مساك والجميع
وصح لسآنك ودام حضورك وابدآعك



يقول الشآعر فيني
امزح امزح ههههههه


جدايلك ظلمة ليلن اسود وخدك نور
‏كما البدر لامنّه غشى ليلة ٍ ظلماء

‏كحيله جميله تنبت الورد بارضٍ بور
‏يصير الجلاد أخضر ولوماسقاه الماء

‏عوافي ياحرف الشعر وقصور ماش قصور
‏مادام القرايح معك تشرب ولاتضمى ..

شاعرة نجد ,ناصر الهواوي معجبون بهذا

روعه هالابيات يالجوهره والله يمسيك والجميع بالخيرات والمسرات
رحيل والشاعره والصقري والغامدي والناقد وابو منصور وغيرهم الله يحفظهم
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــ
تذكرت والذكرى لها بالصدر تاثير
تحرك شعور وبالمشاعر تبين اثار

نوبٍ باقه من الورد وغلافها حرير
ومره تقدح بزند الشقا بالمغربل نار

الا يالهبوب اللي سمعنا لها صفير
تنحي طلبتك عن مهبك شوي يسار

مري من نصب نفسه برغمي علي امير
مرؤوس ورئيس اثنين بالانضمه ما صار

قولي هالجفا بعد الوفا شي مايصير
طعنه قاتله بالقصد مع سابق الاصرار

شاعرة نجد ,الجووهره معجبون بهذا

الجوهره وانا هنيا بقينا
اضف لنا تسعه وسبعين زوار
ــــــــــــــــــــــــــــــــــــــــــــــــــ ــــــــــــــــــــــــــــــــ
كان قبل لحظات عندي الناقد وابوه سمعتهم قصيد وسمعوني الله يجزاهم خير على تواصلهم
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــ
فديت الجبل والطلح والدار والشعيب
توريني الذكرى صور لي وانا العب به

نعم لي بهن عهدٍ تقادم ما هو قريب
وصعيبٍ على الانسان نسيان ما حبه

جلوسي لو الـ لحظات في قربهن يطيب
لكن يستعيد الفكر ما فات وانشب به

يرد الحجر صدى الشجر جالهن نحيب
وصار الصدى والصوت لهمالهن سبه

شاعرة نجد ,الجووهره معجبون بهذا

حضرة خفير السجن لو غبت معذور
خلاص انا فيه متكيف لحالي

يعني على هـ الباب ما انتا بمجبور
ما عاد به مصلوح لا لك ولا لي

ابا اتمشرق واتراكا على السور
واجر موالي واغني والالي

سيان عندي بالهجيني ومجرور
من الطفش ابارفع الصوت عالي

لا الشاعره مرت ولا جاء ابو منصور
وابطا فتى جده وراع الجبالي

حتى رحيل اللي هنيا لها دور
من ننشده يقول ياهملالي

ولا سجع قمريه ولا صوت عصفور
في موطنٍ موحش من الناس خالي

كافي كذا ياهجس وافي ومشكور
ونستني واسعفتني بالتسالي

خيال مطير ,شاعرة نجد ,الجووهره معجبون بهذا

*قلوب البشر ياصاحبي لها مفاتيح*
‏ *وكل قلب مفتاحه بوصف وعلامه*
‏
‏*واذا تبي مفــتاح من غير تصريح*
‏ *افــتح قلـوب النـاس بالابتســامه



ومسآكم ابتساااامه دآيمه يآرب

شاعرة نجد ,ناصر الهواوي معجبون بهذا

ههههههههههههههههههه
اهلا يالجوهرهوالله تشققت افامنا من الكركره ماهيب الابتسامه ولاشفنا شيٍ نفتح
الا ولوا مدبرين ههههههههههههه
صح ذوقك ودام حضورك
ــــــــــــــــــــــــــــــــــــــــــــــــــ ــــــــــــــــــــــــــــــــــــــــ
اسعد الله مساء خفير سجن الرواسي
وكل زاير ومن هو فيه جعله سعيد

الجفاء والله انه جد بالحيل قاسي
ما يقره لغيره كود راسٍ عنيد

السجن فيه من يومين طحت امتواسي
لا فريده علي مرت ولا جاء فريد

اتسمع عساي اوحي مطير نعاسي
مثل ورقا تلاعا فوق خضر الجريد

او لي يمد منها ما يزيل العماسي
رافةً بالسجين اللي مخلى وحيد

وين من فيه فزعه وين ربعي وناسي
النتيجه تساوي صفر هذا الاكيد

شاعرة نجد ,الجووهره معجبون بهذا

لو ما زاروا الدمام اهل نجد كان اشوى
قبل هـ الزياره من هله كان يسمع صوت

كان حضورهم من قبل سيء وصار اسوا
قبل غرغرة حلقوم واليوم ماتت موت

اقصد شاعرتنا اللي بقيفانها نروى
مع الشاعر اللي يذهب عماسنا بـ بيوت

اللي في يدينا قول حيل الله الاقوى
اللي حابسٍ هاروت في بابل وماروت

ان لديت ياهجسي لما فات قل سقوى
تدير الحدث كف القدر دايم بريموت

كل آفه لها بالمجتمع تنتشر عدوى
هذا ماحصل في مجتمعنا وانا مبخوت

شاعرة نجد ,الجووهره معجبون بهذا