** مقتطفــااااتـــي **(خاص)

وليفي شريك الروح ماخفت من عذال
ولكن ظروفه لوّعتني ولوّعته

تعبت وشبعت ولعت من سكة الترحال
ولا ادري وش القَى في طريقي وقارعته

أبيها تزين وكل ماجات عال العال
ولميت بيديني شتاتي وجمعته

تهب الرياح وتدفن احلامي الرمال
ويموت النبات اللي من الروح زارعته

واكفكف دموعي لاسرى ليلها همال
واعبّر بغصة عبرتي,ماتوقعته

على الله تزين ومن حلاها يزين الحال
بجرعة عسل من عقب مرٍّ تجرعته

عبدالله الدّنّيش ,رحيل معجبون بهذا

الناس بردانه وأنا لاهب الشوق
في صدري المكتوم يحرق لهيبه

ماصوّره شعري ولانثر منطوق
غريبه ونشرة حياتي غريبه

لاصرت لافضفضت مـ أرتاح واروق
بلاش والدمعه بعيني قريبه

حدب الضلوع جْسور والقلب صندوق
على خفايا الروح ياطيب طيبه

غيم المشاعر لاسرى ليله بْروق
يااخذ من الوجداان واافر نصيبه

على سناه أنظم من الشعر لي طوق
والبس وتخنقني طلاسم عجيبه

عبدالله الدّنّيش ,رحيل معجبون بهذا

بارك الله فـ القصيد وفـ القلم لاضاق صدري
يشرح الخاطر وهذي حيلتي واقصى جهودي

وأن كشفني حرف شعري واسألوني قلت مدري
والا من نسج الخيال وضاع من يبحث سْدودي

والله انّه والله انّه,مانقص قدره وقدري
بس كثر الشوق ماغذّى المشاعر والوعودي

تنقض الذكرى جروحٍ حطها المكتوب بدري
ومرت الايام واللي راح ماظني يعودي

غرد العصفور فوق السور والا غصن سدري
التبلّد صار فيني مكتسيني لاحدودي!!

عبدالله الدّنّيش معجب بهذا

ياصفحتي وان طول الوقت ماجيت
أرجع واجيب مْن الحروف الجديده

وأكتب عليك مْن أعذب الشعر كم بيت
لامن سرى الهاجس وداري بعيده

واسترجع الذكرى وطرّى وطرّيت
عبر الموبايل ذكرياتٍ عديده

فجّر ينابيع القريحه وغنيت
والقاف ياخلاّف فكيت قيده

واظهر من المخزون ماكان خبيت
وهج المشاعر صار منها قصيده

هزاع محمدالعاصمي ,رحيل ,عبدالله الدّنّيش معجبون بهذا

يقول الهواوي

ياشاعرة نجد خضران القلوب ليا قروا لك قصيد
يرجع بهم للورى ما جد لك وايصفر قلوبها

نوب القصايد اتخفف ما يعانونه ونوبٍ تزيد
وتبذح بمشرط قوافيها لوانه ما اتجه صوبها

باحداث هالوقت قلبٍ يعتبر والقلب الآخر عنيد
به فاهمٍ للحقايق صح واللي شاف مقلوبها

تقديم من ما تيسر للموافق للقصيد الفريد
لمعانقه نسرج مهار البيوت ليا عصت عوبها

ومن بعد ذا ياهجوسي عد بنا للي نبي من جديد
فازت مواعيد عرقوب بثلاث ارباع مكذوبها

يلف حبل الوصل من شان ينقص والمباعد يزيد
ويصنع له معوقات بلا سبب ويسدد دروبها

قلت

يا شاعر المجد كان الشّعْر مايجري بدم الوريد
لامن لعب شاعره وابدع لمن يسمع بمسحوبها

واستمتع ومتّع وجاب الجديد اللي يزيد ويفيد
وهيّض هل الذايقه من عذب قيفانه وغنوا بها

فلا يغني مع الشعار يسبح فــ البحر مايجيد
فن السباحه ولايفْرق شروق الشمس وغْروبها

وان كان هيض غزيري هاجسك ياجعل عمرك مديد
ياما تهيّضت من روعة مواويلك ومكتوبها

وانا سجينه ورى جدران وابواب ومقابض حديد
والحجر طوّل ورحلات الاجازه ضاع مندوبها

والشعر منفس ليا صكت على الخاطر يجيد ويعيد
ترسم به الشاعره وتصوّر الاحداث بـ اسلوبها

رحيل ,عبدالله الدّنّيش معجبون بهذا

ياسمو المشاعر ناشد الليل قلّه
ليش يجلب همومي كل مـ اسدل ظلامه

ليش قلبي ليا ذعذع نسيمه يتله
وليش عيني ياعيني تسهره ماتنامه

فيه قدره عجيبه تذهل الكون كله
يشعل الشوق والمشتاق يرفع غرامه

يستثير ويثير وكل كوكب محله
من بعيد لْبعيد بْهيبته واحترامه

وان تهيّض جزيل الشعر والقاف شله
مايبي لـ سرى الهاجوس غير السلامه!

رحيل ,عبدالله الدّنّيش معجبون بهذا

رائعة يا نجد ..
وجميلة .. كالعادة :)

^
^

الراائع مرورك غاليتي
شكرا جزيلا,’’