هنا .. سجن القوافي !!

صح لسانك يابو عبيد خذ هذي من خيال

أطرق بحور الشعر وأدْرِج خوافيه=وأدوّنه لأهل الأدب والحضاره
وأرمز حروف القاف وأحكم معانيه=ويضيع منهو يدعي بالشطاره
وأن ماحكمة القاف ماني براعيه=ولاني بشاعر دام شعري خساره
يامتابعين الشعر هذي دواعيه=وكل ٍ على شعره يصدر قراره
واليوم أصّدر غاية القصد وأبديه=وأشفّر المعنى وأذيع إختصاره
وأبنسج الموضوع وأنعت مساريه=وأبين أوضاعي بصمت وأوقاره
صبرت مير الصبر جاب المشاريه=ومهما كتمت السد زاد إنفجاره
عزي لقلبٍٍ واهم الضيق حاشيه=لخبط عليه الوقت وأخلف مساره
يسهج عليه الحال جملة مناشيه=ويفوح صدره بين تاره وتاره
وياخذ مع الهاجوس شتا نواحيه=وعقب أنتظام السير بان أنعثاره
مدري وكيف الوضع تبدي مواريه=دام الزمان الشين زاد أنحداره
أمد حبل الوصل والناس تطويه=وأقدم المعروف وألقى أحتقاره
وأبين التقديري والعكس يثنيه=وأخذ تعجّب بالدهر وأندماره
على طريق الحق ما نيب غاويه=من فضل ربي دايماً بالصداره
لكن علي الوقت كثرة حكاويه=وكل ٍ على ما صار ولع شراره
وأصبحت أراجع في وماني وأداريه=ولا شفت شئٍ صار يجلب إثاره
لكن مدام الوضع مقصود تمويه=خل الضعيف يعيش ما من جداره
واليوم هذا العلم جاكم بما فيه=من شاعرن للقاف طاب إختياره
هجس المعني داخل الصدر يزويه=ويبيّن المضمون لأجل إعتباره
وتم الكلام المختصر في مبانيه=ومخـفّـي المقصود داخل عباره

ناصر الهواوي ,الجووهره معجبون بهذا

أروح وأرجع ومهما تبعد خطايه=إن رحت وإن جيت جوالي على حاله
أناظر الشاشة أرقب للوصل آيه=لا فيه مس كول ، ولا حتى به رساله
أقول يمكن يمرّه طيف ذكرايه=يمكنّ الأشواق هزّت قلبه الدّاله
يمكن يناظر صوره العام ويّايه=يمكن يحاول ولكن ما تهيّاله
يمكنّه يحنّ ، يمكن للجفا غايه=يمكن ظروفه ، ويمكنّه يورّى له
لكن أشوفه تمادى لما له نهايه=وتمرّ الأيام مانطري على باله
نسّته الأيام ، والأيام نسّايه=وهذي عوايد طروق الحب وأحواله
ومع ذلك ألقى لصدّه عذر وحكايه=وأقول عذره معه مادامه لحاله
ومهما يطول الجفا والصّد والسّايه=مانيب ناسيه دام القلب يبرى له
ولانيب سامع بحبه لوم ووشايه=مهما يقولون فيّ وفيه عذّاله
لي في غرامه قصيدة شعر وروايه=باقي على العهد والحاله هي الحاله
ومن لامني في هواه بذمتي تايه=ماجرّب الحب في الدنيا ولا ناله
ورغم انقطاع الوصل واعداه واعدايه=القلب باقي على رجواه وآماله
باقي لعلّه يغيّر في الجفا رايه=وأجي وألاقي مِنِه مس كول ورساله

ناصر الهواوي ,الجووهره معجبون بهذا

مساجله بين الشاعر محمد فراج الغنامي , ويوسف الغنامي

يقول محمد الفراج


قال اللذي في عالي الرجم راقيه = وخيول فكره قدم وصفه سرجها
أرتاح لامني توسقت عاليه = والنفس تنسى همها اللي ولجها
نقيت من حلو المعاني معانيه = والهاجس اللي في ضميري نسجها
طارٍن على قلبي من أحلا طواريه = الديره اللي موحشتني حرجها
قم ياشبيه الذيب مبعد مساريه = اللي يبت الطرقه ليا نهجها
اللي هذيبه فالخلا مايعنيه = ليا نوى صعب المخاطر فلجها
ولّم على اللي نازح البعد يطويه = طوي المحاله للرشا لاعلجها
جيب الشبح صنع اليهودي مسويه = اللي مايعرف كيف يرطن لهجها
صمم ولايبغاله أحدٍ يوفيه = في طرقته نفس الدريول بهجها
نبي نسج الرجل والعمر تاليه = السيب الابيض والمطيح بزلجها
لو كنت أعرف الوقت ماني بغاويه = يضيقبك لو هي وساعٍ فججها
نبي ثلاث أيام كلٍ يسليه = شوف الخباري يوم ربي دلجها
فالموقع اللي لاوصلنا حراويه = شفنا القطا فيها وشفنا درجها
وأرضٍ كساها العشب والخير كاسيه = يشبع جملها عقب يشبع نعجها
وأرتاح يايوسف من اللي مبانيه = أتضيق الخاطر ويبطي فرجها
لو كان لي في ظلم غروٍ مهاويه = اللي عيونه لجل عيني دعجها
اللي هواه بداخل القلب كانيه = وأسمه ليا طروه كبدي رهجها
وأنا عن علوم الحكي دوم أداريه = من خوف هرجة هارجٍ لاهرجها
وختامها ياشاعرٍ في مباديه = جزل القصايد للهزل ماعوجها
ولّّم على اللي نازح البعد يطويه = للديره اللي موحشتني حرجها
ا

الرد

يارجم ياللي دايم أروح وأجيه = وأروض المهره عقب مادرجها
أحضر الهاجوس دايم وألاحيه = في معزلٍ والناس مسمع ضججها
أخذ جزيل الشعر والهزل أخليه = وأثبّت العمدان وأجبر عرجها
يامرحبا بالخط ياحي راعيه = حي البيوت اللي جذبني غنجها
للشاعر اللي ننطرب له ونوحيه = روس الشوارد صيدته مابعجها
يلعب بعسر القاف من حر مافيه=يرهي على الجزله ويرفض حججها
شاعر ولد شاعر وينشي مناشيه= والبرق من قدم الرعود ولججها
شرد الفرايد ماتعدا مراميه = في مخدجة فكره بيوتته خدجها
لاوحيت قافك يامحمد تغنيه = ميزت مابين العقول ورججها
أنت الرفيق اللي بالاثمان نشريه = يامسعف الريجيل ساعة حرجها
صاحبك مدة سجتك ماتكفيه = يوم المطر نصف الميبس عوجها
أنوسع الخاطر بشوفة خباريه = فضل الكريم اللي له الناس وجها
وأنا معك في كل دربٍ تتعطيه= وش لي بدارٍ مابقى الا حدجها
سج القدم والهم يلقى مداويه = يوم المطر حاف الرقاق ودرجها
شوف الربيع اللي نبت بأمر واليه = سر النواظر والخواطر بنجها
صوت أم سالم كل وقتٍ نلاحيه = أخير من بعض الديار وهمجها
والحب ماله خاتمه لو تصافيه = ياكثر ماجر القلوب ولخجها
ومن القدر صاحبك مانته بحاميه = ياكثر مامر الوجيه وسهجها
والبعد لوينجيك ماهو بمنجيه = اما أتصل والا لحقبك مسجها

هزاع محمدالعاصمي ,ناصر الهواوي ,الجووهره معجبون بهذا

ياأميرهــ
يا أميره مابقى غير السؤال إلي تثيره=الشوارع والمدينه تسألك كيف الأماره ؟
أمس قبله يا أميره كنتي بحساب الفقيره=وأرتقيتي وأغتنيتي وإنتي ما عندك تجاره !
كيف قولي يا أميره صرتي بحساب الوزيره ؟=فجأه من آخر صفوف الناس صرتي بالصداره !
فجأه أصبحتي شهيره دايره في كل ديره !=تأمرين وتحكمين الشعب في عرف ومهاره
القصايد والمدايح فيك وأشعار كثيره=إللي يمدح في خصالك وإلي يوصف بالصقاره
أشتهرتي بالجمال وملبسك غالي حريره=وأشتهرتي بالتطور والتقدم والحضاره
بعده أصبحتي على كل الوجيه أغلى سفيره=كيف أهلّك الطموح لمنصبك وسط السفاره ؟
الأوادم صابها من وضعك المشبوه حيره=يسألوني ؟ والجواب الحُر تكفيه الإشاره
لا تقولين الحياه بطبعها دايم مثيره=ولا تقولين إن هذا جاك بجهود الشطاره
يا أميره عارفينك لا فطين ولا شطيره=وأدري إنك تتقنين اللعب بأسلوب الإثاره
يعني هذا ناتج التأثير وإعماء البصيره=مثل هذا فعلاً إنك تستحقين الجداره
فعلاً أثبتي كلامك يا أميره يا جديره=مُعجبينك صفقو لرضاك بِاعجاب وحراره
بعد ما صفق لك الجمهور بيحي بالسريره=ليه أصريتي على إنك تطلعين أعلى مناره ؟
شهرتك ما تقنعك لين أنتهيتي مستذيره=خايفه عقب النجاح يكون مردود الخساره ؟
وش يحدك للتعجرف دام للشهره قديره ؟= تقدرين لنيلها لكن ما عندك جساره
يا أميره والبلا هذا الزمان إللي نسيره=يكتب الماضي ولا يمحي من أيامه عباره
لو رجعنا ثم قرينا قصة البنت الصغيره=كان يكفي عن ظلام الليل لا شعشع نهاره
يستثير الخافق إللي لد في عزوة أميره=حينها الدنيا تقوم ولا يهجدها وزاره

ناصر الهواوي ,الجووهره معجبون بهذا

صح لسآنك شآعرنا الهوآوي

وصح لسآن شآعرنا. محمد الفرآج
وصح لسآن الشآعر يوسف الغنآمي

ويعطيك العآفيه خيآل
على الاختيآر الجميل والنقل المميز

ناصر الهواوي ,خيال مطير معجبون بهذا

أبيآت لا يعرف قآئلها
تصور الحاله العامه للمجتمع
هذه الايام

ياوجودي وجد توفيق الربيعة
‏له ثلاث شهور والوضع متردي

‏باح سده والعرب عيّت تطيعه
‏والكورونا من تعدّي في تعدّي

‏ابتلش فيهم مهابيل صديعة
‏كن واحدهم معه عقل مصدي

‏لانصحهم ضيّقوا فيه الوسيعة
‏محدٍ منهم على الرأي متقدي

‏وإن تركهم كل يوم في فجيعة
من يشيل!ومن يجيب!ومن يودي!

وكان جواب الشاعر عبدالمجيد العُمري:

قولوا للعقال والناس الرفيعة
اقضبوا جهالكم لحد يعدي

ودنا ياناس نرجع للطبيعة
والوقاية ماتبي أخذ وردي

الكورونا ياعرب زادت وجيعه
والمشافي حذرت والأمر جدي

بإذن ربي تنفرج عنا سريعة
بس يزيد الوعي نقبل للتحدي



الله يرفع عنا البلاء والوبآء
ويكشف الغمه وترجع الحياة
الى طبيعتها عاجلا غير آجل
يآآآرب

خيال مطير معجب بهذا

يا ليل لا تجرح شعور .المحبين
‏انا معي ذكرى عمر ...ما نستني

‏شيل الستار وحدث النفس باللين
‏ف القلب والله سالفه ...موجعتني

‏قصة غلا ماهي وهم بين.... قلبين
‏في دايرة سجن الغرام ....اسجنتني

‏يا غاليه ل البعد طعنه ......وسكين
‏في خاصرة وجدي عليك.اطعنتني


محمد فهم

هزاع محمدالعاصمي ,ناصر الهواوي ,خيال مطير معجبون بهذا

يقول بن جدلان
رحمه الله



لابد من عقب المطاريش معواد
ولابد من عقب المواجع عوافي..
.
ولابد من عقب السهر لذة ارقاد
ولابد من عقب الكدر جو صافي


صبآحكم خير وتبآشير
وسعآده لا تنتهي .......

شاعرة نجد ,ناصر الهواوي ,خيال مطير معجبون بهذا