قصيدتين مع الحدث بعنوان ( الجزمه وشاريها ) كرمتوا

السلام عليكم ورحمة الله وبركاته
اخواني الاعزاء اقدم اليكم هاتين القصيدتين
متزامنه مع الاحداث الي حصلة الاسبوع الماضي
وهي بعنوان ( الجزمه وشآريها ) كرمتوا
تقبلوها مني ولكم التحيه

******( القصيده الاولى )******

يا بوش ذا قدرك وما انته بخسـران = جزمه على وجهك تنـال الصـداره
الي بمثلـك يمشـي اليـوم فرحـان = مدام الك فـي كـل موطـن وزاره
ذبحتـوا اطفـال ورجـالٍ ونسـوان = ومـن دمنـا شيـدة بـرج التجـاره
وضحيتوا بصدام مـن غيـر نكـران = محدٍ لجل موتـه قـدح لـه شـراره
مع ان موته كان يـا بـوش عنـوان = بقـادم زمـانٍ يكـفـي الله نــاره
وكان الامل من العرب غير ما كـان = غـارات ارضيـه وبالجـو غــاره
وقتٍ مضى صرخة مره تهز الاوطان = وتنهض لها جيوش العرب باقتـداره
واليوم يصرخ رجل ما تدمع اعيـان = كـلٍ يـدور ظـل ذيـك السـتـاره
ولو جت لنا الدنيا على راس نيشـان = كلٍ علـى جـاره يصـوب عيـاره
والي حصل بالامس اهو خير برهان = ان العرب تمشـي بوضـع استـداره
كيف العرب تفرح لجل حذف حذيان = هذي خسـاره مـا بعدهـا خسـاره
مدام يفرحهـم هـذا فانـت كسبـان = عـزاه يـا مجـدٍ تـوالا انهـيـاره
قدر العرب ينقص ويـزداد نقصـان = والظاهر انـه مـا بقـى الا غبـاره
ويا سامعٍ صوتي ليا كنـت غلطـان = قلي تـرى غلطـان والـك البشـاره
ولا تلومنـي مـدام فالقلـب بركـان = يوشك من احداث العـراق انفجـاره

******( القصيده الثانيه )*******

يدفع لجل جزمـه ريـالٍ ودولار = ويرهن لها عشرين مليون كاشـي
آخر خبر يلي تريـدون الاخبـار = هذا البطل يـا نـاس ولا بلاشـي
دخل بموسوعة جينس حقق اوسكار = ووضعه مع الجهال بالحيل ماشـي
ليته شرى له ظان ولا اربع بكـار = ولا شـرى لـه ناقـةٍ ام حاشـي
يشرب لبن ياكل لحم يجلب حـوار = انقول رجلٍ كفو بالطيـب عاشـي
اخير له من جزمه بدون مسمـار = يالله عسى خـده لجلهـا فراشـي

؟؟؟؟؟

سلام من شاعر ليا شب الـه نـار = يجيه مـن قـوة لظاهـا انتعاشـي
ما هاب من قول الحقيقه للاخطار = يشب في قاع البحر ليـن طاشـي
ما كل نار اتسد عن ضو الانـوار = يا كم نـارٍ مـا تنـوش القماشـي
يلي شريت نعـال بامـوالٍ كثـار = وتبغـى تلمعهـا بقطـنٍ وشاشـي
ليتك كفلة الـك يتامـى وقصـار = واطعمة ناسٍ ما تلاقـي معاشـي
ولا طبعة الك مصاحـف واذكـار = وكسية نـاسٍ ساكنـه فالعشاشـي
اخير لك من فعل يِنقصـك مقـدار = ما يمدحك به كود كـذاب واشـي

اخوكم / سامي الرقيب

ونعم


وصح لسااانك ولي الفخر بالمركز الاول

تقبل تقديري وحترامي

السلام عليكم ورحمة الله وبركاته

صـــــــــــــــــح لساااااااااااااااانك على هذه الروائع

الله يعطيك العافيه

تقبل تحياتي

سامي الرقيب
فالأولى والثانيه
أبدعت وأوجزت القول بالروعه والجزاله
صح لسانك وكلك
ودام بوحك بكل خير ومعزه

على الرغم من أن ذلك النعال كان رخيصاً على صاحبه
إلا أنه كان كثيراً بـ حق ذلك الطاغية
الرقيب / سامي
لافض فوك ولا انثلم لك قلم
قصايد تطيب النفوس بها وأكثر
تقديري..

صح لسانك وبيض الله وجهك

قصيدة جزله من رأس جزل