احدى روائع الشاعر الكبير/ عبدالله بن نايف بن عون

02-07-2017, 04:32 AM

يا ماحـلا لا ذعذعـن الهفاهيـف
وقامت تناقرنا هبـوب الصفـاري
وهب البراد ودوّحت شوبة الصيـف
واوحيت للمقناص والطيـر طـاري
واللي يبي شمة هبـوب الشفاشيـف
قـام يتنبـى للبـيـان الــوزاري
يدلى على حزم الجلاميد وطريـف
خطايطـاً فيهـا عوايـن حبـاري
بعض العرب وده ولو جاه تكليـف
يسري ويصبح يم هـاك المحـاري
الناس يقضون الاجـازات بجنيـف
ونايف يمضّي رخصته بالصحاري
صحراء العيون اليا غدت كلها ريف
عند الشرك ولا عـلاوي جـداري
لامن عسّاسـه عطـاه التعاريـف
وامسى عن اللي في حراويـه داري
نادى بقرناساً اليا حيـف ماعيـف
فيه الحم الكدري وريشـة قمـاري
وجت للملامس وفيه ماقيل ياحيـف
مافيه عيب الا من الريـش عـاري
وتوابعاً مثـل الرمـاح المعاكيـف
وامواس مثـل مسلـلات الشبـاري
طرح الشبك من نازحات المحاذيف
جابه حـدا العتبـان ولا المطـاري
اما ولد مطلـق ربيـع المهاجيـف
ولا السليس دحيم ذيـب الغـداري
جابـه لشيخـاً يرتكـي للتكاليـف
الله يجيره عن صـدوف الجـواري
شيخـاً تلحفنـا حسانيـه تلحيـف
ماهوب عن حق الخوي بمتـواري
شيخاً هواه لاحصل له على الكيـف
تعرض النسناس مـع كـل فـاري
ونقل الحـرار وهدهـا بالاطانيـف
اما ضحـى ولا وروك الظهـاري
وليا كفخ حل العصيـر الطهيريـف
ربداً مطيرهـا الرفيـق المبـاري
اوقف وتبعهن طويـل الاطاريـف
حراً على بعد المطاليـب ضـاري
الصافي اللي حاز حلو التواصيـف
لّحاق عـزّام الحبـاري اجبـاري
واليا انزعج ظاقتبهـن المحاريـف
وتزبنن قـوع الشجـر والمـذاري
ومن عقب ماهن للعزامـة مواليـف
قاموا عليهـن يظربـون البـواري
ومضواه في بيتاً كما نايـف القيـف
في صفح نزواً عايفتهـا الـذواري
اليا شيدوه اللـي لبنيـه معاسيـف
وحطوا مشب النار بيـن القـواري
ناراً حطبهـا يشتـرى بالتجازيـف
عمـال ماتلحـق عليـه اللـواري
نـاراً يصاليـهـا دلالاً مهـاديـف
صهباً وصلوا النار فيهـن مـواري
صهباً عليها الجور مامنـه تخفيـف
زاماً لهـا ليلـي وزامـاً نهـاري
صفراً خنين بهارهن من ورى الليف
يطرد عماس اللي من البعد سـاري
اليا درجوهن وادرجن العجاريـف
وكل أفلجً بفعـول طيـره يمـاري
اقفن هواجيـس الظمايـر مناكيـف
والطير عن راعيه شال الطـواري
مع ظف اخو نورة بعيد الاشاويـف
شيخاً بوسع الخلق مالـه مجـاري
ولاني بفاخـر وتفاخـر بتزييـف
الا..ولاالبس من ثيـاب العـواري
افخر بحكامن حموا نجـد بالسيـف
والشعب اشادوا مستواه الحظـاري
وافخر بقرب اللي بعيداً عن الحيف
شيخـاً بعدلـه بيننلـه شــواري
ومدحه ماهوب خراط ولاتواهيـف
عن عرف والكاذب لعلـه نيـاري

ملكة الرواسي ,محمد الغنامي ,رحيل و 1 آخرون معجبون بهذا