ســــلام يــاذخـــر الــرجـــال الـنــعـــاتــيـــت

بسم الله الرحمن الرحيم
هذه القصيدة المتواضعة في والدي الشيخ : مــــفـــــرح بـــــن نـــــاجـــي بـــــن مــــرزوق الــمــغـــيـــــري الــعــــتــيــبــــي ( فارس الكرم ) حــــفـــــظـــه الله واطال في عمره وهي تعبر عن مايكنه ضميري له وهي لها مناسبة ومهما قلت
انا أو غيري لانوفي حق الوالدين فحق الوالدين عظيم جداً جداً ،،

سلام ياذخر الرجال النعاتيت = سلام يا مفرح كريم السبالي
سلام يااللي للوفاء والكرم بيت = سلامٍ يخصك ياقرم العيالي
يالنادراللي بالعرب ذايع الصيت = كساب قولت نعم لاجا مجالي
يشهد علي الله ماعنك سجيت =دايم خيالك مايفارق خيالي
غالي وإذا طولت عن شوفك اشفيت= وبان الخلل في مشيتي واعتدالي
في خدمتك لي الشرف ماتوانيت = تامر وانا انفذمافيها جدالي
قبل تكلم جيت كلي ولبيت = اجيك كلي زولي يسبق ظلالي
رضاك عند بعد رضا حامي البيت = رب الفلق منشي صدوق الخيالي
في بر ابن ناجي حشا ماتواطيت = بس الزمان العنجهي مايبالي
ياما وياما عالي الرجم عديت = عشقي وهندابي دروب المعالي
ذروة سنام المجد فوقه تعليت = وشربت فجال التحدي لحالي
كيف الصعايب من دلاله تقهويت = شربت فنجال العلوم الثقالي
ابيوت شعري وصفها كالدناميت =في داخلي جايلهن اجتوالي
من عذب شعري نادر القاف غنيت = رفعت صوتي بالبيوت الجزالي
البيت يسعى ياأبو مشعل ورى البيت = كلٍ يقول الغالي يطرب لغالي
سمان المعاني صلت فيها ونقيت = آسم طرايفها المهار الغفالي
عسفتها نقيتها زين ووفيت = انقا العيون وراهياتن احبالي
في نظمها كل الصعايب تحديت =ارقا سنود اصوغها فالعلالي
واختامها موفيك ياشايع الصيت = انا وشعري فدوتك والحلالي
وياسامع الإمثال هل انت صليت = على شفيع الخلق منهي الظلالي

الشاعر الإبن البار/ جــازي بــن مــفــرح بــن نـاجــي (حــــــاوي الــطـيــب)