( المحبــه مابها مخطي ) !

حزني إللي كل ما قلت بيْعْدي=عوّد لنفسي القشرى وعذبها
رجّع الماضي وأنا ماهو بودي=يكشف أوراق(ن) من القلب شاطبها
ليتني بنسى شقى حظ متردي=يوم رجلي في هوى الغير متعبها
هنت نفسي لأجل حب(ن) لعن جدي=والكرامه فالهوى من يحاسبها ?
المحبه مابها مخطي ومقْدي=علة(ن) فالقلب نجهل سبايبها
يوم إبن عدوان وجده مثل وجدي=سيرته للحين نقرى ونكتبها
من يلوم النفس لا بحت له سدي ؟=قلبه أطناب(ن) تطارخ مقاضبها
وجد عيني والفجر ضوحه بيبدي=والجهات أربع وضاقت مضاربها
وين مالديت وجهي تجي ضدي=غلطة إللي من غلاها يعذربها
يوم تلتني وأنا شفق , مشتدي=ودي ولا ودي أرخي مجاذبها
كنت أحاول ما أبين لها حدي=مير جابتني من أقصاي لـَ ... أقربها
وأسرفت بي لين طاحت على كبدي=هذا اْنا للحين أصدق وأكذبها
ما دريت إني ببين لها ودي=وإثرني لاَمن تضايقت أخربها
شفتها تاخذ مع الناس وتودي=ضاقت الدنيا وشبت شبايبها
ذكرتني سالفة صبحي الوردي=يوم جتني بالخبر من تعجبها
حذفتي للغتره بمزحي الجدي=لأجلها يوم أقبلت لي ركايبها
مير ما تفهم عليّه ولا تجْدي=بالكلام إللي يليق ويناسبها
لين جابتها وأنا عيني تلدي=مثل ما سوت معي جيت أعاتبها
لو تقول العذر , ما فات ! ماردي=الحقايق قدم عينك مجنبها
هيك بدك بس / أنا هيك ما بدي=تشرّق الخطوه وقلبي مغربها
تغْلط , وتبعد , وتعلنْ لي الصدي=ترجي الأيام تدفن عواقبها
وأنت في عيني , وفي قلبي , وعندي=غير كل الناس ربعي وأجانبها
لا تطول جزر صدك وأنا مدي !=السهر عين من يهواك عاقبها
كم ليل(ن) جيت بالشوق متحدي=بايع(ن) نفسي على حساب طالبها
أرقب القمرى ودمعي على خدي=والرسايل في يميني وأقلبها
وأحمد الله إنْ معي شي(ن) يهدي=ذكريات(ن) منك رحمه وكاسبها
وأطلب الله كان لي حظ متردي=نفسي لغيرك أبد ما يعذبها

سطام الشمري