الله اكبر

الله اكبر كيف دنيانا تلف
حال نصبح به ويمسي الليل حال

كل حال عن خويه مختلف
واغلب احوالي غنيه بالوبال

جرح يبرى وجرح آخر له خلف
والصبر ما عاد لي فيه احتمال

كلماقلت الهوى فيني وقف
جدده بالقلب ربات الجمال

العيون الي تسلهم بالطرف
تسحر الزاهد وتغوي بو العيال

وسط سوق العنقري شفنا رهف
العبايه خصر وارموشه طوال

قلت زينك ياحلو فوق الوصف
فيك حسن الكون وارشاقة غزال

التفت لي قام قلبي يرتجف
قال دور غيرنا يابن الحلال

قلت قلبي بين ضلعانه يرف
خلي في قلبك لنا بعض المجال

قالت اسمع..انت شكلك مستخف
قلت يا بنت الهوى ما هو هبال

صار لي ساعه ونا بعدك الف
والهوى يحكم على قلب الرجال

ابتسم لما سمعني وانحرف
يمنا ثم انحنى والخصر مال

قالت اخلص وش تبي ريقي نشف
قلت هذا الرقم وارجو الاتصال

اتصل بي الساعه اثناعش ونصف
ليلةٍ ياليت فيها الليل طال

قلت ساكن وين قلي واعترف
قالت اسكن جنب دوار الدّلال

والتقينا واجتمعنا بالولف
واحتواني في حنانه والدلال

بعدها لي عام مدري وين ذلف
لعنبو حظي ردي يابو طلال

ياهل الطايف نبيها لو سلف
ساعدوني لا تقولو ذا محال

منيتي ليله مع الحلوه رهف
واعتقد ما عاد لي غير الخيال