الانعزال ..

05-04-2017, 01:35 AM

السلام عليكم جميعا..مصافحتي الاولى .. اخترت ان تكون اقربها لـ نفسي

شخصيّتي تفرض عليّ الانعزال=يغلب عليّ الصمت و احب الهدو
سجّة فكر يصفي بها جوّ الخيال=مثل المطر لا هلّ في عين البدو
من عقبها ينبت على صدري سؤال=هل يا ترى قصّوا اثاري وفقدوا ؟!
احباب مابقّوا دموع و طول بال=حتى الهجاد بحالي النوم هجدوا
ماهوب انا اللي قطّع حبال الوصال=هم روّحوا عنّي وبالفرقا بدوا
للصد في الخفّاق قوّات احتلال=و قلبي يلم الشمل و يصد العدو
ما ودي افتح للجفا باب و مجال=آطيب / لو اللي تردّوا بي رِدَوا
ولو ان احاسيسي حكمها الانفعال=ماكانوا العذّال قاموا و قعدوا
ماعندي الا طيب وجه و طيب فال =دام اقتدي بـ اجدادي وفيما اقتدوا
على البشر مهما طغى ظلم و ضلال=انا مع اللي جاهدوا واللي اهتدوا
اغلب مشاعرنا تبيح الارتجال=لذلك الشعار غنوا و قصدوا
يقبض علي الضيق في وقت الاصال=عل و عسى يطلق سراحي بالغدو
الحب باقي والمشاعر لا تزال=بـ احيك للذكرى على صدري سدو
ولا هو حرام الحب لا والله حلال=مير البلا فالناس و سلوم البدو

.
.
وسلاااامتكم

عبدالله الصقري ,ناصر الهواوي ,رحيل و 8 آخرون معجبون بهذا