بلَّغني أبو عبيد بالجوال عن أبياته، فأجبته بهذه الأبيات

على سكة الابداع جينا نحث السير=لجل ناصر اللي جاء يدوِّر لفزعاتي
لو إن الهوى راعيه فيه العقول تْحير=وفتوى الهوى ماهيب ضمن اختصاصاتي
لَكَن جتني الشكوى ولا تَقْبل التأخير=أبا اشحذ لك الهمّة واسوق اقتراحاتي
علاجك تجيب الفحص مع موجز التقرير=ليا مِنْ ضمَنْت كْمَيْت نضمن لك مْراتي
ولا صار سهم الحب ما يقبل التطوير=فعِدِّه مع الحيين مِن ضمن الأمواتي
وأنا خابرك لمَّاح تفهم بلا تكرير=عوايد لبيب العقل رهن الاشاراتي
وخل الهوى في حب مهره، وبنت بعير=وبيت الحرم، وفياض نجد العذياتي
وإذا مرَّت الذكرى وجاب الفكر تصوير=لذيك القصور اللي شوارع ولمباتي
تماكن عفيف وخلك أسرع من المعصير=على ضِلْعه الاصفر اخذ خمس لفاتي
وترى الضلع فيه مْقيم ولّا الطيور تطير=وما فات يا ونيَّان ما ينفع الآتي