ياليتني أطلع على قمة طْويق
واجر موالي واغني لْحالي

ماحولي الا الشامخات الشواهيق
اللي صداها مع صدا الصوت عالي

لي مع جديد القاف عهْد ومواثيق
شعر ومشاعر وان بغيته تسالي

معناي مابين الضلوع المغاليق
من ماضياتٍ مالها اوّل وتالي

هي هكذا الدنيا حْظوظ وتوافيق
وكلٍ على ليلاه والعمر بالي

ياطير ياللي تاخذ الجو تحليق
عطني جناحينك وانا اعطيك شالي

واصير طير وكل ماحافني ضيق
أفرد جناحي وارتفع فـ العلالي