شبكة رواسي نجد الأدبية - عرض مشاركة واحدة

12-10-2021, 03:04 PM

وتفضل سجينا قهوة العصريه

ذكرتني قصيده شآعرنا قصيده عن القهوه
لاخوي الله يحفظه
من نآحية القآفيه للشطر الأول
نفس الكلمات والقافيه

يقول شآعرنا كديميس

و عدودهن من جمّ ياعذب الأنفاس "
"فيضه وغيضه نابع(ن) من زلاله

و ذراه عن سافي الهبايب والاطعاس "
"زرعه يحيطه من جنوب وشماله

و النفث منهن مع صبا نجد نسناس "
"نفث المباخر في مجالس شكاله

ويقوول أخوي

يا ما حلا عقب التعب وسط الأطعاس

جمع الهشيم اللي من الوقت بالي

وقت العصيروبارد كل نسناس

يا زين شب النار والقفر خالي

يا زين ريح النار يطرب لها الراس

واليا وامرت القرم جاب الدلالي

بن اليمن فكه وحطه بمحماس

حطه على جمر ويصلاه صالي

حمسة خبير ما اشعله كل هوجاس

ما هوب في حمسة غشيم وسالي

خله ليا منه يجي كنه نحاس

اشقر كما لون الشفق في الزوالي

وهات المبرد قبل تثليث الأجراس

تثليت نجر يعرفه كل عالي

ودقه بنجر جارك اللّه من الباس

دقه بفن وخل صوته يلالي

ولا فاح ماك فكب بنك بمقياس

وخله يفوح وماك خله زلالي

واليا قطع ريحه تشمه بالأنفاس

جره يهون ولا تزله بحالي

وبهر دلالك جعل يفداك الأنجاس

بهيل ومسمار وخله عدالي

وحطه بوزن وراعي الكيف حساس

وزلة عليه وقرب الجمر تالي

وخله يفوح وينقلب ثقل ينحاس

وهات القدوع اللي من الدبس خالي

واجذب لنا الدله وصبه بلا كاس

صبه بفنجال من الصين غالي

ومده لمن هو عارفينه على ساس

خص الصديق وخص قرم العيالي

هذا هو اللي معجبه كل نوماس

وأنا أشهد أنه عقبها طاب فالي

تمت وصلوا عد مادايس داس

وعداد ما تضوي عليه الليالي

على النبي اللي لنا خير نبراس

اللي بعث به عقب وقت الضلالي

وسلااااامتكم
وصح لسآن شآعرنا كديميس
وصح لسآن أخوي
ههههههه

عبدالله الصقري ,كديميس السيحاني ,ناصر الهواوي و 1 آخرون معجبون بهذا