شبكة رواسي نجد الأدبية - عرض مشاركة واحدة

09-09-2020, 01:06 AM

مما قال الشاعر
عبد العزيز بن صالح المقبل
رحمه الله
في جبل طويق

حينما شق طريق الرياض الطائف السريع جبل طويق ورأى الشاعر مرابع الصبا ، ومراقب الوعول ، تلتهمها البلدوزرات ليخترقها الطريق عبر ما يسمى ب(القدية ) اليوم ،تأثر كثيراً بذلك وقال مستعيداً ذكرياته :

يا والله اللي تزلزل نايف الجالي

مدهال حجل القوايم هدّوا خشومه

هدّوا رفيع النبا والمرقب العالي

ابو مطيريد مع نبعان وقصومه

عْلِيت يا مرقبٍ للصيد مدهالِ

هذي مواريه فيه وهذي رسومه

ياما تلوّى بجاله كل ختالِ

قبل صلاة الفجر ما ياخذه نومه

يشيل مسلوبة يطرَب لها البالِ

سبرٍ علمها وهي في الصيد ملحومه

صنع الفرنجي عليها لفة حبالِ

يشقى بها واحدٍ ما صوبن هدومه

يقدح ذخيره وزنده يشعل اشعالي

إشعال برقٍ سرى في مَقْدم غيومه

هذي تواصيف جيل وقبله أجيالِ

وكلٍ خذا له من الطيب مقسومه

،،،،،،

وحينما شاهد صورة لأحد الوعول في إحدى المجلات، تذكر أيام اقتناصه في قمة حبه الأول (طويق) فقال معبراً عن خبرته بصيد الوعول :

صورة وعل حصلتها بالمجله

كبّرتها وبروزتها من غلاها

في قمة بطويق في مرتعٍ له

بفروعها يرعى ويزبن حجاها

وا زين شوف قرونه المستقله

مثل السيوف اليا اصطفق في قراها

اما كل من شال التفق حابيٍ له

ماهوب ضبٍ جاحرٍ في وطاها

اولاهوب طيرٍ له جناحٍ يفلّه

ولاهوب وبرٍ صلّته ما عداها

يزبن شواهيق رفاعٍ مظلّه

ما كل من كبرت متونه رقاها

كم واحدٍ فاته وهو لاقفٍ له

عدّاه عنه مشمرخاتٍ عطاها

،،،،،،،،

ومما قاله مودعاً لهذا الجبل:طويق

قام قلبي يرجّ ودمع عيني يسيل

نازلٍ للسهل من عقب هاك الرفاع

يا نوايف خشوم طويق قرب الرحيل

وصل وقت ارتحالي والوداع الوداع

ما بقى بالعمر يا كود شيٍ قليل

راح وقت الشباب وحلّ وقت الضياع

ناصر الهواوي ,رحيل ,عبدالله الصقري و 1 آخرون معجبون بهذا