شبكة رواسي نجد الأدبية - عرض مشاركة واحدة

11-12-2019, 12:41 AM

الناس فيها أجناس شياً خيالي
مثل الأصابع يوم أوصف وأنا أقول
أحدن رقى في قمة المجد عالي
الله جمع له بين كلمات وفعول
قرمن يحبونه زحول الرجالي
من شبته يبقى على الطيب مجبول
حيثن به تقوى وله راس مالي
فالدين والدنيا من الخير مشمول
وفالصدق والاخلاق رجلن مثالي
معروف بين الناس ماهوب مجهول
يبين لك لا بان ميل الليالي
اليا قصر عنها من الضعف مبدول
حيدٍ لربعه مثل حيد الجبالي
لو كان لا تاجر ولا هو بمسؤول
واحدٍ يبا المرقى ومرقاه دالي
هرجن بليا فعل ما حصل الطول
والهرج ما يرفع قصير المدالي
ولا حط له من شان وافين وزحول
راعيه مسكينٍ من العقل خالي
يركض ورا الأحلام ركضٍ على طول
تضحك به الناس العقال الثقالي
أهل الوفاء والطيب والفعل والقول
تلقاه دايم فالمجالس يلالي
بالكذب لا جابه على هرج معسول
ولا فيه كذبٍ غير ويبين تالي
ويصبح وجه راعيه ميت وفشول

بدر شباب العضياني

الجووهره ,عبدالله الصقري معجبون بهذا