شبكة رواسي نجد الأدبية - عرض مشاركة واحدة

28-11-2019, 01:15 AM

أدخل على الله وأسلم الأمر تسليـم
أستغفـره وأستذكـره وأستميحـه
وضح النوايا والمسـاري مجاهيـم
والحلم غالـي والليالـي شحيحـه
سـادت مفاهيـم وبـادت مفاهيـم
ويح الزمن يابنت الأجـواد ويحـه
خلي علـوم ممسسيـن المرازيـم
واخذي علوم مصمصمين القريحه
حنا سلايل عبـس يامذيـر الريـم
حنـا مقابيـس الوغـى يامليحـه
حنا سلايل قاسـم الخيـل ودليـم
وزعاتنـا يـوم المكايـد رجيحـه
بدو حفايا مـا انصفتنـا المقاسيـم
وبصدورنا عـزٍ تطـارخ فحيحـه
نرعى رفيف البرق في ساقة الغيم
ومن يستبيح حدودنـا مـا نبيحـه
وليا ترع في هرجته دفش وبهيـم
خطو الهبود الي تكابـر فطيحـه
عن ساقط الهرجه نطق الملاطيـم
ومن طاح فيها مارحمنـا مطيحـه
نكبر عن الطفسه ونجزع من الضيم
ونموت ما ناطا شليـل الفضيحـه
نزوم زومات الرجـال المحاشيـم
ونهد هـدات النمـور الجريحـه
ربـع علـى در المنايـا مفاطيـم
من هازنا زاغت عجوزه تصيحـه
أليـا تغشلينـا عسيـر الشغاميـم
لومك على الي ما يبرهن مديحـه
وان لولشـن محشمـات الملاثيـم
والموت حثرب بالحناجر ضبيحـه
جينا من اقصانا سحـاب مراديـم
كل يذكي حروتـه عـن نطيحـه
يازيـن دح قفوشنـا لـه ترانيـم
والعج واقف والفعايـل صريحـه
كان المنايا سوقهـا مابعـد سيـم
والخوف برك بالقلـوب الكسيحـه
حنـا زباينهـا علـي المـلازيـم
علـم يقريـه النصيـح لنصيحـه
واللي بنـا بيتـه نبيـه ابراهيـم
إنا طريـق المستميـت لضريحـه
بني رشيد إن عتـم الجـو تعتيـم
ما للـردى فينـا ملامـح وليحـه
اجسر من الرعاد واكرم من الديـم
سمر الجباه اهـل الوجيـه الفليـحه
خوينـا نقريـه عـزه وتحشـيـم
دخيلنا دونه عن المـوت صيحـه
يابنـت ماحنـا فقـارى معاديـم
لو ما سكنـا بالقصـور الفسيحـه
تجار لو ما حاشت يدينـا ملاليـم
ومن الغنـاه نفوسنـا مستريحـه
مانستضيق اليـا لفونـا معازيـم
للضيف لو نذبـح حدينـا ذبيحـه
دايـم يدينـا للعطايـا موالـيـم
لاخانت الفزعـه وجيـه كليحـه
طال القريض ومقبـل الودومقيـم
والبـال عييـا طارقـه لايريحـه
أقولها وأبصم على القول تبصيـم
والعلم بين زايفـه مـن صحيحـه
ماهو قصور بالحرار الصماصيـم
كل بدرب العز قـد هـب ريحـه
مدحي لربعـي مايـذم الأكاريـم
ولايستشـك الا خبيـث الشريحـه
والحق واضح للرجـال المفاهيـم
والحقد يخرث بالنفـوس القبيحـه
والشر من جيت معزي وهـو نيـم
واليوم وحده والشريعـه سميحـه

مساعد الرشيدي

ناصر الهواوي ,هزاع محمدالعاصمي ,عبدالله الصقري و 1 آخرون معجبون بهذا