ما يليق الكحل الأسود على الطرف الحزين=لو تكحلني خبيرة جمال وماهره

خاطري عقب السعه صار للضيقه رهين=والضماير بالبكاء والحسايف عامره

ينهمر دمعي ليا قالوا من العايدين=ول يا عينٍ على الصبر ماهي قادره

ما هقيت اصبر على البعد لو الصبر زين=إن صبرت االيوم بكره فلاني صابره

ما حلا عقب التفراق شبكات اليدين=والجفاء عقب الوصل يقطع الله دابره

يا نظر عيني وقلبي ومنوة كل عين=زينةٍ في بيت أهلها عفيفه طاهره

افتقدتك وامتلا خاطري شوق وحنين=وصد قلبي عن وصالك سحى ومكابره

والمكابر والسحى شيمة العقل الرزين=لو هواجيس الضماير ورودٍ صادره

ما جداي إلا الترجي على مر السنين=والدموع اللي على وجنتي متناثره

شينه بحقي وحق الجدود الأولين=إني ألحق مقفيٍ لو وصوفه نادره

الكرامه شأنها شأن في عسرٍ ولين=مادخلت بعزة النفس يوم مغامره

والله إنه ما يراود خيالي كل حين=واتعوذ منه لا مرني واحاذره

غير من عقب البطا لا نشدتك كنت وين=واكتشفتك مآ انت محبوبي اللي خابره

وأنا ما أحب ما اعترض في دروب الراحلين=ولا اتمنى شوفة اللي كرهني خاطره

واقتنع بموادعك وانت ما منّك ثنين=وماخذٍ حبك بقلبي مكانه شاغره

ولا انا ماهوب ينقصني من الزين زين=فوق ماني بنت قومٍ كرام وشاعره

والقدر مامنه مهروب والخافي يبين=والوعد بكره وبكره قريب لناظره

بكرة الأيام تعطيني العلم اليقين=كان حبك صدق ولا مشاعر عابره

‏