ذكر الله أول ونبدأ به وواجبنا= ذكر الله أبدى من الكاتب ومكتوبه
تبنا يمقدام من طرد الهوى تبنا= ما باقي الا نقول ونعلن التوبه
رحنا وجينا وشرقنا وغربنا= وأقدامنا حفيت من الحب ودروبه
قلي يمقدام يابن العم وش جبنا=يالله تسامح سهيل وتغفر ذنوبه
والرب من فوقنا دايم مراقبنا=وذنوبنا في الصحايف دوم مكتوبه
عبلة وليلى ومي وهند مع لبنى=في حبهم يا صحيبي أكبر أكذوبه
أحدٍ مصدق وأحد يمكن يكذبنا= يقول هذا سهيل ونعرف أسلوبه
دون الثريا ركز ساقه وحاربنا=لو تاب يمكن جلكسي تاب محبوبه
واليوم مهموم ما فادت تجاربنا=دوبه درى الشاعر العذري بعذروبه
ما غرنا في الزمان إلا مواهبنا= والله ما حققت لسهيل مطلوبه
إلى متى لين ما تنزل حواجبنا= ما نتعظ والمصايب أكبر أعقوبه
يالله لك الحمد دسمنا شواربنا=كل توضي بماه وينفخ ذروبه
وختامها يالله تحقق مطالبنا= ترفق بعبدك سهيل وتستر عيوبه
وآخر كلامٍ نقوله بعدما تبنا= ذكرالله أبدى من الكاتب ومكتوبه

جتني هجوسن على طرقٍ تلاعِبنا = والهاجس اللي طرقها الحين/ يا دوبه

طرقٍ على شيلة المَغْنَى تناسبنا = "من بادي الوقت" وأصحابي تغنوا به
ما أمداني أقرأ القصيد اللي تجاذِبنا = إلا وهاضت شجون الشعر بعذوبه
قريتها وأثرها من شعر شايبنا = اللي حكاها وحاك الحرف بعجوبه
يا هي قصيدة غزل هبت هبايبنا = وإلا قصيدهْ ، رثاها الحظ في ثوبه
القاف والقافية والقصد والمبنى = حبكة معاني حبكها سهيل بسلوبه
يا شيخ " مقدام" وش حيلة معزبنا = يندب حظوظه وصار الشعر مندوبه
هذا سهيل أبن عمك من حبايبنا = "عرقوب" منّاه حتى طاح عرقوبه
عشق الثريا حلالٍ في مذاهبنا = غير ان طرد الثريا يفقده صوبه
أسأل مجرب وقد شابت ذوايبنا = أيام في غلبها وأيام مغلوبه
يا ما على بحرها عامت قواربنا = والبحرلا هاج موجه فاض منسوبه
لا هبت أرياحها وأنسامها طبنا = يشتاق بحّارها للبحر وأركوبه
يا هي على بعدها دايم تقرّبنا = وليا ابتعدنا دموع الشوق مسكوبه
ي/سهيل بستودعك ربي ليا غبنا = أبن الملوّح قضى عمره بلا توبه