مهما تغيب و تبتعد مقدر انساك= صورتك دايم ما تفارق خيالي
الله عليك بداخل القلب مغلاك= كل الغلا لك يا بعد كل غالي
يا كثر ما احبك و ياكثر ما اهواك= محبتي لك مالها اول وتالي
كل المشاعر في غيابك تحراك= تسهر على ذكراك طول الليالي
تشكي معانيها لحرفك ومعناك= حرفك يسليها ليا ضاق بالي
وانسى تعب دنياي لا صرت وياك= من فرحتي ما كن شي جرالي
تضحك لي ايامي على بسمة شفاك= وقلب العنا عن كل الاحزان سالي
سبحانه اللي كمل الحسن واعطاك= يا كامل الاوصاف يا بعد حالي
مالك شبيه بين ذولا وذولاك= حسنك علي كل الغنادير عالي
اشرح لك اشواقي علي كف يمناك= وصدر الوله في خاطره كم سؤالي
عنده تفاصيلي وياما تمناك= من واهج الاحساس يسقيك حالي
حلم بحياتي نظرةٍ في محياك= قبل اقتراب أجلي ويوم ارتحالي
حبك ملا قلبي بروعة مزاياك= محلا غرامك يا حسين الدلالي