لاتـرفع اللثـمه دخيل ابوك وتعـض الشفاه=عابر سـبيل وجيـتكم طرقي وماشي لـ هلي
لاتبتلـيني كب عنـك الغـنج يامـال الغـنـاه=ثم ابتلـيك بحـلو منـطـوقي واوريـك جهلي
شاعر وابا اعلمك مـن يمشي ورا الشعار تاه=مسلم واخاف الله يحاسبني على سو عملي
ذنوبي اكبر من جبال طويق وجبال السراه=حملي وابا اشتاله على كتفي وفي ظهرجملي
اقسم معاد اذنب واسوي ذنب لو اني ما اباه=واستغفر الله واطلبه عفوه لذنبي وزللي
عاشق وقلب العاشق يسوقه على كل اتجاه=مشاعره تحداه لو قلبه من ايمانه ملي
اللي يحبه حت لو يخطي ماطالع في خطاه=وعلى البسيطه مامشى مثله ولاجاله حلي