شبكة رواسي نجد الأدبية - عرض مشاركة واحدة

07-07-2017, 04:55 PM

يا مدور الهين ترى الكايد احلى
واسأل مغني كايدات الطــروقي

الزين غالي لكن الازين اغلــى
ولكل شراي بضاعة و سوقي

النو عالي و السمى فوقه أعلى
لي فاق علم جاه علم يفوقي

الصعب هلَى قلت ياصعب سهلا
دامك تبيني فانت ياصعب شوقي

أحب اعسف المهرة اللي تغلى
و احب اروض كل طرف يموقي

و احب أسافر مع سحاب تعلَى
و احب فوق الغيم لمع البروقي

و احب اساهر بدري اللي تجلى
و ارسم شعاع الشمس عند الشروقي

يامن على ثاير فوادي تولى
خلك على قلب الكرامة شفوقي

اكرم عزيز بالعمر ما استذلا
يسوق عمره للمشاريف سوقي

اخترتك من الناس للقلب خلاَ
يا حيثك مرادي و كيفي و ذوقي

ما رحت أدور كل زول تحلى
لولاك تسوى ما عطيتك خفوقي

قرناس الحرار ,النجلاء ,ملكة الرواسي و 1 آخرون معجبون بهذا