ابتلت قلبي بليّه ويل قلبٍ تبتليه=يوم شفت الشوفه اللي شفتها يوم الربوع
شفت من يا شفت عينه لدّت بشيٍّ تبيه=كنّها عين النداوي يوم حقق للطلوع
عين فرخٍ حوّجوه وبانت الحاجه عليه=ليلتينٍ ما تعشّى بين برد وبين جوع
كنت اظن القلب طيحات المحبّه ما تجيه=لين طحت بخدعة الوقت المخادع امخدوع
طحت في حب الهنوف اللي هواها طاح فيه=كل من تلّت خفوقه من محاديب الضلوع
خشف ريمٍ بالوصايف ما يشابه له شبيه=فيه للقمرا ضياها وفيه للنجمه سطوع
يوم صدّر صك قلبي وصار قلبي ملك ايديه=غاب عنّي غيبة اللي ما لغيباته رجوع