إن قلت لك تبت ، قلبي منك ماتابي = ومن شان حبك حشمت القلب وقدّرته
شكاك قلب ٍ بوسط الجوف بك ذابي = نبضة جفاك بحشا صدري مكدرته
لاهجرس الفكر أعض إبهامي بنابي = وأدق صدري لطاري ٍ بك ، تذكرته
فتحت لك ، باب ، تقديري ،، وترحابي = وكل باب ٍ بخاطري يزعلك سكرّته
شوقي لشوفك منوّخ ، عندك ركابي = والقلب ياما ،، على ،، لقياك صّبرته
وشوقك لشوفي ، يزاورني للأعتابي =شدّه حنين ، المشاعر ، يوم ظهّرته
شوق ٍعليه الحشا ، بالوجد منصابي = من جور مافيه ،، خافي السد بعثرته
كل من نشدني عن الحالة والأسبابي = حمدت ربي ،، وحبل الهرج ، قصّرته
مخفيه من حاسد ٍ، واشي ، ومغتابي = وعن ناقل الهرج ، بين الناس ، دثرّته
طيفك يجيني ،، توالي الليل ، يرقابي = وفي نفسي أقول صفو الوقت عكّرته
ونعيش في جو، ما نحسب له حسابي = وقيد ٍ حداني على فرقاك ، كسّرته
إن كان ،، ظنك بحبي ،، يالغلا خابي = فظني بحبك حشا ، ما أقول ، غيّرته
شوفي دموع الوله منها الهدب شابي = و بالصدر ، ثاير لظى ، صبري تزفرّته
بكاك ، قلب ٍ ، وجرحه ، ما بعد طابي = من فرحته بك ،، توفى ،، يوم بشرّته
وكفّنت أنا جثة ...! المغدور،، بثيابي = وحطيت لأجل الوفاء بالجوف مقبرته